KHwabon ki wadiyon mein dilon ko phirae hai

ḳhvāboñ kī vādiyoñ meñ diloñ ko phirā.e hai

dariyā meñ jab bhī lahr koī sar uThā.e hai

nas nas meñ rach gayā hai takallum kā bāñkpan

āñkhoñ kī ḳhāmushī bhī mujhe gudgudā.e hai

rishtoñ kī dhuup shaam huī aur Dhal ga.ī

ab us se kyā gila vo agar bhuul jaa.e hai

darvāze khul ga.e haiñ bahut tez hai havā

tinkā samajh ke koī mujhe bhī uḌaa.e hai

lamhe laraz rahe haiñ fazā.eñ udaas haiñ

sham.a-e-tasavvurāt kī lau thartharā.e hai

mere nuqūsh-e-pā mujhe lauTā de rahguzar

ik kārvān-e-ġham mire pīchhe bhī aa.e hai

hai tez dhuup sāya-e-qurbat talāsh kar

aise meñ ghūmne koī bāhar bhī jaa.e hai

'parvāz' zindagī ko abas chheḌte haiñ aap

bechārī jaane kitnoñ ke naḳhre uThā.e hai

KHwabon ki wadiyon mein dilon ko phirae hai

dariya mein jab bhi lahr koi sar uThae hai

nas nas mein rach gaya hai takallum ka bankpan

aankhon ki KHamushi bhi mujhe gudgudae hai

rishton ki dhup sham hui aur Dhal gai

ab us se kya gila wo agar bhul jae hai

darwaze khul gae hain bahut tez hai hawa

tinka samajh ke koi mujhe bhi uDae hai

lamhe laraz rahe hain fazaen udas hain

shama-e-tasawwuraat ki lau thartharae hai

mere nuqush-e-pa mujhe lauTa de rahguzar

ek karwan-e-gham mere pichhe bhi aae hai

hai tez dhup saya-e-qurbat talash kar

aise mein ghumne koi bahar bhi jae hai

'parwaz' zindagi ko abas chheDte hain aap

bechaari jaane kitnon ke naKHre uThae hai