KHwabon sa koi KHwab banane mein lagi hun

ḳhvāboñ sā koī ḳhvāb banāne meñ lagī huuñ

ik dasht meñ huuñ pyaas bujhāne meñ lagī huuñ

batlāo koī ism mujhe radd-e-balā kā

maiñ āḳhirī kirdār nibhāne meñ lagī huuñ

vo sahn meñ aflāk liye kab se khaḌā hai

maiñ chhat pe huuñ bādal ko uḌāne meñ lagī huuñ

ik umr huī peḌ pe do naam likhe the

ik umr se vo naam miTāne meñ lagī huuñ

rukne na kabhī paa.e safar raushniyoñ kā

dariyā meñ charāġhoñ ko bahāne meñ lagī huuñ

jis vaqt se aane kā sunā hai tirā ghar meñ

chīzoñ ko maiñ rakhne meñ uThāne meñ lagī huuñ

jaltā bhī hai bujhtā bhī hai uḌtā bhī hai jugnū

sūraj ko ye ehsās dilāne meñ lagī huuñ

bujhne ko hai ab ḳhālī diyā umr-e-ravāñ kā

maiñ huuñ ki havāoñ ko manāne meñ lagī huuñ

KHwabon sa koi KHwab banane mein lagi hun

ek dasht mein hun pyas bujhane mein lagi hun

batlao koi ism mujhe radd-e-bala ka

main aaKHiri kirdar nibhane mein lagi hun

wo sahn mein aflak liye kab se khaDa hai

main chhat pe hun baadal ko uDane mein lagi hun

ek umr hui peD pe do nam likhe the

ek umr se wo nam miTane mein lagi hun

rukne na kabhi pae safar raushniyon ka

dariya mein charaghon ko bahane mein lagi hun

jis waqt se aane ka suna hai tera ghar mein

chizon ko main rakhne mein uThane mein lagi hun

jalta bhi hai bujhta bhi hai uDta bhi hai jugnu

suraj ko ye ehsas dilane mein lagi hun

bujhne ko hai ab KHali diya umr-e-rawan ka

main hun ki hawaon ko manane mein lagi hun