KHwah mahsur hi kar den dar-o-diwar mujhe

ḳhvāh mahsūr hī kar deñ dar-o-dīvār mujhe

ghar ko banñe nahīñ denā kabhī bāzār mujhe

maiñ ise dast-e-adū meñ nahīñ jaane dūñgā

sar kī qīmat pe bhī mahñgī nahīñ dastār mujhe

maiñ jo chaltā huuñ to āñkheñ bhī khulī rakhtā huuñ

itnā saada bhī na samjheñ mire sālār mujhe

phir tavāzun meñ rahegī mirī naav kab tak

jab Dubone pe tule haiñ mire patvār mujhe

yā zamāna mirī taqlīd meñ aa niklegā

yā kahīñ kā na rakheñge mire me.ayār mujhe

ab mirā hijr mujhe saath liye phirtā hai

jā.iye ab koī sāthī nahīñ darkār mujhe

is tarah sochte rahnā nahīñ achchhā 'shahzād'

fikr-e-sehhat hī na kar de kahīñ bīmār mujhe

KHwah mahsur hi kar den dar-o-diwar mujhe

ghar ko banne nahin dena kabhi bazar mujhe

main ise dast-e-adu mein nahin jaane dunga

sar ki qimat pe bhi mahngi nahin dastar mujhe

main jo chalta hun to aankhen bhi khuli rakhta hun

itna sada bhi na samjhen mere salar mujhe

phir tawazun mein rahegi meri naw kab tak

jab Dubone pe tule hain mere patwar mujhe

ya zamana meri taqlid mein aa niklega

ya kahin ka na rakhenge mere meayar mujhe

ab mera hijr mujhe sath liye phirta hai

jaiye ab koi sathi nahin darkar mujhe

is tarah sochte rahna nahin achchha 'shahzad'

fikr-e-sehhat hi na kar de kahin bimar mujhe