KHwah-maKHwah be-sabab luTai hui

ḳhvāh-maḳhvāh be-sabab luTā.ī huī

'umr bhī baap kī kamā.ī huī

hijr meñ vasl kī talāsh meñ the

vaqt se is liye laḌā.ī huī

tujh ko lag jaa.e zindagī merī

mujh ko aa.e kisī kī aa.ī huī

terī yādoñ ke naam hotī hai

chaa.e aksar mirī banā.ī huī

yādoñ kī gaThḌī meñ bachā kyā hai

ik qasam yaad hai uThā.ī huī

le ke phirte haiñ raat bhar ham log

sub.h meñ shām-e-ġham manā.ī huī

dasht se chhāle the chhupā.e hue

pyaas dariyā se thī chhupā.ī huī

ham ne hañs kar dikhā diyā 'sāhib'

rok lī baat muñh meñ aa.ī huī

KHwah-maKHwah be-sabab luTai hui

'umr bhi bap ki kamai hui

hijr mein wasl ki talash mein the

waqt se is liye laDai hui

tujh ko lag jae zindagi meri

mujh ko aae kisi ki aai hui

teri yaadon ke nam hoti hai

chae aksar meri banai hui

yaadon ki gaThDi mein bacha kya hai

ek qasam yaad hai uThai hui

le ke phirte hain raat bhar hum log

subh mein sham-e-gham manai hui

dasht se chhaale the chhupae hue

pyas dariya se thi chhupai hui

hum ne hans kar dikha diya 'sahib'

rok li baat munh mein aai hui