KHwah muflisi se nikal gaya ya tawangari se nikal gaya

ḳhvāh muflisī se nikal gayā yā tavañgarī se nikal gayā

vahī vaqt asl-e-hayāt thā jo hañsī-ḳhushī se nikal gayā

use bhuul jā.ūñ ye kah ke maiñ vo mirā nahīñ thā nahīñ nahīñ

mujhe de ke jo na.ī zindagī mirī zindagī se nikal gayā

kise apnā kah ke pukāriye kise dil ke ghar meñ utāriye

vo jo pyaar naam kā vasf thā ḳhū-e-ādmī se nikal gayā

jo lage sameTne maal dhan to sameTte hī chale ga.e

yahīñ chhoḌ jā.eñge sab kā sab ye dimāġh hī se nikal gayā

kahīñ bāhar apne vajūd ke na hai jot koī na nuur hai

jise apne dil meñ ziyā milī vahī tīrgī se nikal gayā

sabhī ik maqām pe jā mile haañ bas ek farq zarūr thā

koī is galī se nikal gayā koī us galī se nikal gayā

yahāñ jis kisī ne bhī sach kahā use maut tak kī milī sazā

ye to 'shād' terā nasīb thā to bhalī-burī se nikal gayā

KHwah muflisi se nikal gaya ya tawangari se nikal gaya

wahi waqt asl-e-hayat tha jo hansi-KHushi se nikal gaya

use bhul jaun ye kah ke main wo mera nahin tha nahin nahin

mujhe de ke jo nai zindagi meri zindagi se nikal gaya

kise apna kah ke pukariye kise dil ke ghar mein utariye

wo jo pyar nam ka wasf tha KHu-e-admi se nikal gaya

jo lage sameTne mal dhan to sameTte hi chale gae

yahin chhoD jaenge sab ka sab ye dimagh hi se nikal gaya

kahin bahar apne wajud ke na hai jot koi na nur hai

jise apne dil mein ziya mili wahi tirgi se nikal gaya

sabhi ek maqam pe ja mile han bas ek farq zarur tha

koi is gali se nikal gaya koi us gali se nikal gaya

yahan jis kisi ne bhi sach kaha use maut tak ki mili saza

ye to 'shad' tera nasib tha to bhali-buri se nikal gaya