KHwahish jo dil mein thi use marne nahin diya

ḳhvāhish jo dil meñ thī use marne nahīñ diyā

palkoñ pe āñsuoñ ko bikharne nahīñ diyā

le aa.ī huuñ maiñ aañkh meñ ik shab sameT kar

paiġhām koī mujh ko sahar ne nahīñ diyā

sab dhuup kā libās pahan kar khaḌe rahe

saaya yahāñ kisī bhī shajar ne nahīñ diyā

vo merā kuchh nahīñ thā magar is ke bāvajūd

dil meñ use kisī ke utarne nahīñ diyā

har-sū dikhā.ī detā thā mujh ko jamāl-e-yār

so dil meñ naqsh-e-ġhair ubharne nahīñ diyā

dekho tumhāre hijr se haarī nahīñ huuñ maiñ

dil ko kabhī vafā se mukarne nahīñ diyā

dīvār-o-dar se apne hī khaTkā lagā rahā

mujh ko sukūn mere hī ghar ne nahīñ diyā

kaise kahūñ 'sadaf' ki mire rahnumāoñ ne

manzil pe paañv tak mujhe dharne nahīñ diyā

KHwahish jo dil mein thi use marne nahin diya

palkon pe aansuon ko bikharne nahin diya

le aai hun main aankh mein ek shab sameT kar

paigham koi mujh ko sahar ne nahin diya

sab dhup ka libas pahan kar khaDe rahe

saya yahan kisi bhi shajar ne nahin diya

wo mera kuchh nahin tha magar is ke bawajud

dil mein use kisi ke utarne nahin diya

har-su dikhai deta tha mujh ko jamal-e-yar

so dil mein naqsh-e-ghair ubharne nahin diya

dekho tumhaare hijr se haari nahin hun main

dil ko kabhi wafa se mukarne nahin diya

diwar-o-dar se apne hi khaTka laga raha

mujh ko sukun mere hi ghar ne nahin diya

kaise kahun 'sadaf' ki mere rahnumaon ne

manzil pe panw tak mujhe dharne nahin diya