KHwahish ke peD ko kabhi phalne nahin diya

ḳhvāhish ke peḌ ko kabhī phalne nahīñ diyā

patthar kā meñh ghar pe barasne nahīñ diyā

ḳhāmoshiyoñ se chhilne lagīñ thiiñ samā.ateñ

lekin sadā ko zaḳhm pa malne nahīñ diyā

ḳhvāboñ kī kirchiyoñ ne mujhe zaḳhm to diye

āñkhoñ se phir bhī ḳhuun Tapakne nahīñ diyā

chhiḌkā hai us pe sabr kā paanī tamām umr

jazbāt kā alaav bhaḌakne nahīñ diyā

lipTī jo jism se to kiyā shaam ke sipurd

parchhā.īñ ko bhī paañv pe girne nahīñ diyā

sab se baḌe shujā' se thā merā ma.arka

lekin aanā ne mujh ko palaTne nahīñ diyā

rasta ye kis tarah kā hai sahrā-e-zindagī

is ne to do qadam mujhe chalne nahīñ diyā

KHwahish ke peD ko kabhi phalne nahin diya

patthar ka meinh ghar pe barasne nahin diya

KHamoshiyon se chhilne lagin thin samaaten

lekin sada ko zaKHm pa malne nahin diya

KHwabon ki kirchiyon ne mujhe zaKHm to diye

aankhon se phir bhi KHun Tapakne nahin diya

chhiDka hai us pe sabr ka pani tamam umr

jazbaat ka alaw bhaDakne nahin diya

lipTi jo jism se to kiya sham ke sipurd

parchhain ko bhi panw pe girne nahin diya

sab se baDe shuja' se tha mera marka

lekin aana ne mujh ko palaTne nahin diya

rasta ye kis tarah ka hai sahra-e-zindagi

is ne to do qadam mujhe chalne nahin diya