KHwahish ko apne dard ke andar sameT le

ḳhvāhish ko apne dard ke andar sameT le

pardāz bār-e-dosh hai tū par sameT le

apnī talab ko ġhair kī dahlīz par na Daal

vo haath khiñch gayā hai tū chādar sameT le

surḳhī tulū-e-sub.h kī lauh-e-ufuq pe likh

saare badan kā ḳhuun jabīñ par sameT le

yakjā nahīñ kitāb-e-hunar ke varaq hanūz

ayyām-e-harf-harf kā daftar sameT le

jo peḌ hil chuke haiñ unheñ āñdhiyoñ pe chhoḌ

shāyad havā ye raah ke patthar sameT le

zinda lahū to shahr kī galiyoñ meñ hai ravāñ

'shāhid' ragoñ meñ kaun ye mahshar sameT le

KHwahish ko apne dard ke andar sameT le

pardaz bar-e-dosh hai tu par sameT le

apni talab ko ghair ki dahliz par na Dal

wo hath khinch gaya hai tu chadar sameT le

surKHi tulu-e-subh ki lauh-e-ufuq pe likh

sare badan ka KHun jabin par sameT le

yakja nahin kitab-e-hunar ke waraq hanuz

ayyam-e-harf-harf ka daftar sameT le

jo peD hil chuke hain unhen aandhiyon pe chhoD

shayad hawa ye rah ke patthar sameT le

zinda lahu to shahr ki galiyon mein hai rawan

'shahid' ragon mein kaun ye mahshar sameT le