KHwahish se kahin koi mahaul badalta hai

ḳhvāhish se kahīñ koī māhaul badaltā hai

dil sham' kā jaltā hai tab mom pighaltā hai

dekheñ to charāġhoñ ko ab kaun bujhā.egā

tāqoñ meñ lahū apnā har raat ko jaltā hai

sochā hai ki kuchh din ko begāna hī ban jaa.eñ

ham apnā jise samjheñ begāna nikaltā hai

ab saḳht zarūrat hai mai-ḳhāna badalne kī

har lab ke liye saaqī paimāna badaltā hai

jis raah se vo guzreñ har gaam bahārāñ ho

ik jism nahīñ chaltā māhaul bhī chaltā hai

ai dost tire dar tak phailī haiñ kamīñ-gāheñ

dil ek musāfir hai girtā hai sañbhaltā hai

ham hijr meñ jab jaage thī raat bahut 'saifī'

dīdār kā har mausam lamhāt meñ Dhaltā hai

KHwahish se kahin koi mahaul badalta hai

dil sham' ka jalta hai tab mom pighalta hai

dekhen to charaghon ko ab kaun bujhaega

taqon mein lahu apna har raat ko jalta hai

socha hai ki kuchh din ko begana hi ban jaen

hum apna jise samjhen begana nikalta hai

ab saKHt zarurat hai mai-KHana badalne ki

har lab ke liye saqi paimana badalta hai

jis rah se wo guzren har gam bahaaran ho

ek jism nahin chalta mahaul bhi chalta hai

ai dost tere dar tak phaili hain kamin-gahen

dil ek musafir hai girta hai sanbhalta hai

hum hijr mein jab jage thi raat bahut 'saifi'

didar ka har mausam lamhat mein Dhalta hai