KHwahishen marna thoDe pe guzara karna

ḳhvāhisheñ mārnā thoḌe pe guzārā karnā

yā'nī duniyā hī meñ duniyā se kināra karnā

tujh ko mā'lūm nahīñ rasm-e-faqīrī kyā hai

ḳhaak ko ḳhaak meñ rakh rakh ke nihārā karnā

'ishq khul jā.egā ik roz mire ḳhāk-nashīñ

ḳhalvateñ DhūñDnā al-haq pukārā karnā

gar ye ḳhvāhish hai ki tū 'ishq ko raqsāñ dekhe

un kī mahfil meñ kabhī zikr hamārā karnā

koī mā'nī nahīñ rakhtā hai dar-e-bāb-e-junūñ

kis taraf dekhnā kis or ishāra karnā

'aql kā kaam nahīñ kār-e-junūñ meñ ai dil

varna āsān kahāñ ḳhud kā ḳhasāra karnā

zer ho jā.egī ye 'aib-talab terī sarisht

ḳhud ke ā.īne meñ ḳhud hī kā nazāra karnā

un kī chaukhaT pe tū rakh aanā 'aqīdat ke gulāb

ai sabā aaj ye ik kaam hamārā karnā

dil kī chāhat hai ki bas yaar kī bastī meñ qiyām

ai mire 'ḳhāna-ba-dosh' aaj dubāra karnā

KHwahishen marna thoDe pe guzara karna

ya'ni duniya hi mein duniya se kinara karna

tujh ko ma'lum nahin rasm-e-faqiri kya hai

KHak ko KHak mein rakh rakh ke nihaara karna

'ishq khul jaega ek roz mere KHak-nashin

KHalwaten DhunDna al-haq pukara karna

gar ye KHwahish hai ki tu 'ishq ko raqsan dekhe

un ki mahfil mein kabhi zikr hamara karna

koi ma'ni nahin rakhta hai dar-e-bab-e-junun

kis taraf dekhna kis or ishaara karna

'aql ka kaam nahin kar-e-junun mein ai dil

warna aasan kahan KHud ka KHasara karna

zer ho jaegi ye 'aib-talab teri sarisht

KHud ke aaine mein KHud hi ka nazara karna

un ki chaukhaT pe tu rakh aana 'aqidat ke gulab

ai saba aaj ye ek kaam hamara karna

dil ki chahat hai ki bas yar ki basti mein qiyam

ai mere 'KHana-ba-dosh' aaj dubara karna