KHwariyan badnamiyan ruswaiyan

ḳhvāriyāñ badnāmiyāñ rusvā.iyāñ

ishq ne shakleñ ye sab dikhlā.iyāñ

vo hī kiiñ bāteñ jo tujh ko bhā.iyāñ

bal be ai zālim tirī ḳhud-rā.iyāñ

mar ga.e lākhoñ hī aur parvāna kī

kyā kahūñ maiñ us kī be-parvā.iyāñ

ek sūrat ke liye is ishq meñ

saikḌoñ sūrat kī haiñ rusvā.iyāñ

shauq meñ āġhosh-e-teġh-e-nāz ke

zaḳhm-e-dil lete haiñ sab añgḌā.iyāñ

ham se pūchhe koī uzlat kā maza

gosha-e-sahrā hai aur tanhā.iyāñ

dil mushabbak sūrat-e-bādām hai

barchhiyāñ palkoñ kī kis kī khā.iyāñ

ḳhāna-e-dil par hamāre yā nasīb

bādaloñ ne bijliyāñ barsā.iyāñ

'mus.hafī' bhī hai phañkaitoñ meñ miyāñ

yaad haiñ us ko bhī kitnī ghā.iyāñ

KHwariyan badnamiyan ruswaiyan

ishq ne shaklen ye sab dikhlaiyan

wo hi kin baaten jo tujh ko bhaiyan

bal be ai zalim teri KHud-raiyan

mar gae lakhon hi aur parwana ki

kya kahun main us ki be-parwaiyan

ek surat ke liye is ishq mein

saikDon surat ki hain ruswaiyan

shauq mein aaghosh-e-tegh-e-naz ke

zaKHm-e-dil lete hain sab angDaiyan

hum se puchhe koi uzlat ka maza

gosha-e-sahra hai aur tanhaiyan

dil mushabbak surat-e-baadam hai

barchhiyan palkon ki kis ki khaiyan

KHana-e-dil par hamare ya nasib

baadalon ne bijliyan barsaiyan

'mushafi' bhi hai phankaiton mein miyan

yaad hain us ko bhi kitni ghaiyan