ki maine aah-e-garm jo furqat ki raat mein

kī maiñ ne āh-e-garm jo furqat kī raat meñ

ġhul paḌ gayā ki aag lagī kā.enāt meñ

lākhoñ se maiñ do-chār huā shash-jihāt meñ

tujh sā na paayā DhūñD liyā kā.enāt meñ

chaltī hai tere haath qayāmat qadam qadam

ejāz-e-īsvī hai tirī baat baat meñ

nīchī nigāh-e-nāz ne kuchh to churā liyā

āñkheñ lagī huī thiiñ magar dil ke ghaat meñ

murdoñ meñ jaan aa ga.ī jab tere lab hile

iisā ko kyā kalām rahā terī baat meñ

sun le tumhāre gar lab-e-jāñ-baḳhsh kā maza

mar jaa.e ḳhizr Duub ke āb-e-hayāt meñ

aise suḳhan meñ kyā hai maza jis ke sāma.īn

ma.anī hī DhūñDhte phireñ kashf-ul-luġhāt meñ

kyā tāb-e-sham.a hai sar-e-mahfil jo sar uThā.e

'sho.ala' zabān kaTtī hai vaañ baat baat meñ

ki main ne aah-e-garm jo furqat ki raat mein

ghul paD gaya ki aag lagi kaenat mein

lakhon se main do-chaar hua shash-jihat mein

tujh sa na paya DhunD liya kaenat mein

chalti hai tere hath qayamat qadam qadam

ejaz-e-iswi hai teri baat baat mein

nichi nigah-e-naz ne kuchh to chura liya

aankhen lagi hui thin magar dil ke ghat mein

murdon mein jaan aa gai jab tere lab hile

isa ko kya kalam raha teri baat mein

sun le tumhaare gar lab-e-jaan-baKHsh ka maza

mar jae KHizr Dub ke aab-e-hayat mein

aise suKHan mein kya hai maza jis ke samain

mani hi DhunDhte phiren kashf-ul-lughat mein

kya tab-e-shama hai sar-e-mahfil jo sar uThae

'shoala' zaban kaTti hai wan baat baat mein