ki tu ne lab-kushai to kis ke huzur ki

kī tū ne lab-kushā.ī to kis ke huzūr kī

ab kirchiyāñ sameT dil-e-nā-subūr kī

kis ke lahhū meñ shaam nahā kar hai surḳh-rū

kis ne chukā.ī ḳhuun se qīmat ġhurūr kī

sadiyoñ se kis kī qabr pe girya-kunāñ hai raat

leTā hai kaun oḌh ke chādar ye nuur kī

ilm-o-kamāl aap kī mīrās kyā kahā

parteñ na kholiye mere tahtush-shu.ūr kī

taqdīr jitnā chāhe mujhe dar-ba-dar kare

miTTī se ḳhū na jā.egī burhān-pūr kī

phir bā-adab haiñ lafz-o-ma.ānī mire huzūr

phir fauj utar rahī hai ḳhayāl-e-tuyūr kī

tafhīm āñ-janāb ye 'ġhālib' kā sher hai

kuchh an-kahī batā.iye bainassutūr kī

ham ḳhud se ham-kalām ho.e kam nahīñ 'nadīm'

jāveñ kalīm sair kareñ koh-e-tūr kī

ki tu ne lab-kushai to kis ke huzur ki

ab kirchiyan sameT dil-e-na-subur ki

kis ke lahhu mein sham naha kar hai surKH-ru

kis ne chukai KHun se qimat ghurur ki

sadiyon se kis ki qabr pe girya-kunan hai raat

leTa hai kaun oDh ke chadar ye nur ki

ilm-o-kamal aap ki miras kya kaha

parten na kholiye mere tahtush-shuur ki

taqdir jitna chahe mujhe dar-ba-dar kare

miTTi se KHu na jaegi burhan-pur ki

phir ba-adab hain lafz-o-maani mere huzur

phir fauj utar rahi hai KHayal-e-tuyur ki

tafhim aan-janab ye 'ghaalib' ka sher hai

kuchh an-kahi bataiye bainassutur ki

hum KHud se ham-kalam hoe kam nahin 'nadim'

jawen kalim sair karen koh-e-tur ki