kin mausamon mein aaegi ikkiswin sadi

kin mausamoñ meñ aa.egī ikkīsvīñ sadī

kyā kyā hameñ dikhā.egī ikkīsvīñ sadī

kitne na.e charāġh jalāne ke vāste

kitne diye bujhā.egī ikkīsvīñ sadī

sūkhe hue laboñ pe jo sadiyoñ kī pyaas hai

kyā pyaas vo bujhā.egī ikkīsvīñ sadī

har ik sadī ke ḳhvāb na.e aur na.e azaab

kyā khel ab rachā.egī ikkīsvīñ sadī

ye bīsvīñ sadī to qayāmat se kam na thī

kyā hashr ab uThā.egī ikkīsvīñ sadī

sab ke diloñ meñ guuñj hai jis inqalāb kī

vo guuñj kyā sunā.egī ikkīsvīñ sadī

jitne savāl dil meñ haiñ shoa.la-fishāñ 'jamīl'

sab kā javāb lā.egī ikkīsvīñ sadī

kin mausamon mein aaegi ikkiswin sadi

kya kya hamein dikhaegi ikkiswin sadi

kitne nae charagh jalane ke waste

kitne diye bujhaegi ikkiswin sadi

sukhe hue labon pe jo sadiyon ki pyas hai

kya pyas wo bujhaegi ikkiswin sadi

har ek sadi ke KHwab nae aur nae azab

kya khel ab rachaegi ikkiswin sadi

ye biswin sadi to qayamat se kam na thi

kya hashr ab uThaegi ikkiswin sadi

sab ke dilon mein gunj hai jis inqalab ki

wo gunj kya sunaegi ikkiswin sadi

jitne sawal dil mein hain shoala-fishan 'jamil'

sab ka jawab laegi ikkiswin sadi