kin ujlaton se apni jawani guzar gai

kin ujlatoñ se apnī javānī guzar ga.ī

āñdhī sī ik uThī idhar aa.ī udhar ga.ī

duniyā ke hādsoñ ne bigāḌe hazār kaam

itnā huā ki apnī tabī.at sañvar ga.ī

be-vaj.h ye sukūn mayassar nahīñ mujhe

tum aa ga.e to gardish-e-daurāñ Thahar ga.ī

hotā hai maslahat kī binā par har inqalāb

aa.ī sahar jo bazm se sham-e-sahar ga.ī

paayā jise rafīq-e-amal har gunāh meñ

hairāñ huuñ maiñ ki ab vo javānī kidhar ga.ī

huuñ ḳhāmī-e-mazāq-e-tamanna se sharmsār

aaya nazar na kuchh bhī jahāñ tak nazar ga.ī

pābandī-e-quyūd-e-mohabbat ke bāvajūd

sau baar tujh ko DhūñDne merī nazar ga.ī

ai gardish-e-mudām sañbhalne bhī de mujhe

ab to kisī kī yaad bhī dil se utar ga.ī

'sāhir' ye qaul hazrat-e-ġhālib kā hai bajā

ab ābrū-e-sheva-e-ahl-e-nazar ga.ī

kin ujlaton se apni jawani guzar gai

aandhi si ek uThi idhar aai udhar gai

duniya ke hadson ne bigaDe hazar kaam

itna hua ki apni tabiat sanwar gai

be-wajh ye sukun mayassar nahin mujhe

tum aa gae to gardish-e-dauran Thahar gai

hota hai maslahat ki bina par har inqalab

aai sahar jo bazm se sham-e-sahar gai

paya jise rafiq-e-amal har gunah mein

hairan hun main ki ab wo jawani kidhar gai

hun KHami-e-mazaq-e-tamanna se sharmsar

aaya nazar na kuchh bhi jahan tak nazar gai

pabandi-e-quyud-e-mohabbat ke bawajud

sau bar tujh ko DhunDne meri nazar gai

ai gardish-e-mudam sanbhalne bhi de mujhe

ab to kisi ki yaad bhi dil se utar gai

'sahir' ye qaul hazrat-e-ghaalib ka hai baja

ab aabru-e-shewa-e-ahl-e-nazar gai