kinare toDta munh-zor pani dekhna ho

kināre toḌtā muñh-zor paanī dekhnā ho

palaT aao jo dariyā-e-ma'ānī dekhnā ho

yahāñ hairat-shanāsā guftugūeñ Dūbtī haiñ

ma'ānī DhūñDhnā maqsad ho mā'nī dekhnā ho

liye phirtā huuñ saath apne unhī chiḌiyoñ kī chahkār

mujhe dekho jo peḌ ik āshyiānī dekhnā ho

hamārī be-bizā’at be-zabānī dekh lenā

agar koī samundar jāvedānī dekhnā ho

yahīñ par pech khātā Dūbtā zāhir hai hotā

agar 'arsa zamānī lā-zamānī dekhnā ho

ḳhud apne aap ko pahle sañbhal kar thoḌā dekhe

mujhe jis ne barāh-e-mehrbānī dekhnā ho

mire hamrāh kuchh kah kar na vāpas lauTnā ho

mire hamrāh qahr-e-be-zabānī dekhnā ho

nazar karnā mire muḌte hue raste kī jānib

kināra yā sitāra āsmānī dekhnā ho

hameñ dekho ki ham haiñ zinda-e-jāved 'jāved'

kisī ne koī faanī ġhair-fānī dekhnā ho

kinare toDta munh-zor pani dekhna ho

palaT aao jo dariya-e-ma'ani dekhna ho

yahan hairat-shanasa guftuguen Dubti hain

ma'ani DhunDhna maqsad ho ma'ni dekhna ho

liye phirta hun sath apne unhi chiDiyon ki chahkar

mujhe dekho jo peD ek aashyiani dekhna ho

hamari be-biza’at be-zabani dekh lena

agar koi samundar jawedani dekhna ho

yahin par pech khata Dubta zahir hai hota

agar 'arsa zamani la-zamani dekhna ho

KHud apne aap ko pahle sanbhal kar thoDa dekhe

mujhe jis ne barah-e-mehrbani dekhna ho

mere hamrah kuchh kah kar na wapas lauTna ho

mere hamrah qahr-e-be-zabani dekhna ho

nazar karna mere muDte hue raste ki jaanib

kinara ya sitara aasmani dekhna ho

hamein dekho ki hum hain zinda-e-jawed 'jawed'

kisi ne koi fani ghair-fani dekhna ho