kinaron mein bhi aisi duriyan hoti nahin thin

kināroñ meñ bhī aisī dūriyāñ hotī nahīñ thiiñ

so is dariyā meñ pahle kashtiyāñ hotī nahīñ thiiñ

zamīñ apnī thī par fasleñ ugāte the kisī kī

zabāñ hotī thī apnī boliyāñ hotī nahīñ thiiñ

phir ik din ġhol yādoñ kā utar aayā thā dil meñ

'ajab jangal thā us meñ hirniyāñ hotī nahīñ thiiñ

hamāre darmiyāñ vo din bhī guzre haiñ ki ham tum

judā hote the par tanhā.iyāñ hotī nahīñ thiiñ

sunā karte haiñ us bastī meñ ik aisā kuaañ thā

ghaḌe bharne ko jis par laḌkiyāñ hotī nahīñ thiiñ

maiñ din aur raat meñ tafrīq kar saktā thā tab bhī

ki jab din raat meñ tabdīliyāñ hotī nahīñ thiiñ

ham aisī raat meñ aksar milā karte the 'qāsim'

diyā jaltā thā aur parchhā.iyāñ hotī nahīñ thiiñ

kinaron mein bhi aisi duriyan hoti nahin thin

so is dariya mein pahle kashtiyan hoti nahin thin

zamin apni thi par faslen ugate the kisi ki

zaban hoti thi apni boliyan hoti nahin thin

phir ek din ghol yaadon ka utar aaya tha dil mein

'ajab jangal tha us mein hirniyan hoti nahin thin

hamare darmiyan wo din bhi guzre hain ki hum tum

juda hote the par tanhaiyan hoti nahin thin

suna karte hain us basti mein ek aisa kuan tha

ghaDe bharne ko jis par laDkiyan hoti nahin thin

main din aur raat mein tafriq kar sakta tha tab bhi

ki jab din raat mein tabdiliyan hoti nahin thin

hum aisi raat mein aksar mila karte the 'qasim'

diya jalta tha aur parchhaiyan hoti nahin thin