kirchi kirchi man ke andar sare KHwab chhupae hain

kirchī kirchī man ke andar saare ḳhvāb chhupā.e haiñ

sach kī ḳhātir dekho ham ne kyā kyā dard uThā.e haiñ

sach kā parcham le kar niklī jhūToñ kī is bastī meñ

zaḳhmī zaḳhmī jism hai merā patthar kaise khaa.e haiñ

tapte jalte patthar jaise log yahāñ bāzāroñ meñ

har-sū chhāyā sannāTā hai yaas ke gahre saa.e haiñ

chup kī gahrī ghātoñ meñ shorīda kuchh āvāzeñ haiñ

bastī bastī sahrā sahrā kaise tūfāñ chhā.e haiñ

kaise koī baat kare ab ta.azīreñ haiñ sochoñ par

amn ko yuuñ mahkūm kiyā hākim ne lab silvā.e haiñ

jhuuT daġhā ilzām-tarāshī jin kā sheva aam huā

hirs-zada sochoñ ke hāmil andar se ghabrā.e haiñ

'shafaq' abhī se chhoḌ ga.ī dil kyā tujh ko ma.alūm bhī hai

rāh-e-haqīqat meñ kis kis ne apne sar kaTvā.e haiñ

kirchi kirchi man ke andar sare KHwab chhupae hain

sach ki KHatir dekho hum ne kya kya dard uThae hain

sach ka parcham le kar nikli jhuTon ki is basti mein

zaKHmi zaKHmi jism hai mera patthar kaise khae hain

tapte jalte patthar jaise log yahan bazaron mein

har-su chhaya sannaTa hai yas ke gahre sae hain

chup ki gahri ghaton mein shorida kuchh aawazen hain

basti basti sahra sahra kaise tufan chhae hain

kaise koi baat kare ab taziren hain sochon par

amn ko yun mahkum kiya hakim ne lab silwae hain

jhuT dagha ilzam-tarashi jin ka shewa aam hua

hirs-zada sochon ke hamil andar se ghabrae hain

'shafaq' abhi se chhoD gai dil kya tujh ko malum bhi hai

rah-e-haqiqat mein kis kis ne apne sar kaTwae hain