kis burj mein falak ne sitare milae hain

kis burj meñ falak ne sitāre milā.e haiñ

dast-e-shab-e-firāq meñ saa.e hī saa.e haiñ

gulzār-e-zindagī ke haiñ gul-dān ke nahīñ

ye phuul kār-ḳhāna-e-qudarat se aa.e haiñ

ḳhasta hue tane to jaḌeñ phūTne lagīñ

peḌoñ ne apne apne badan phir ugaa.e haiñ

sāmān-e-būd-o-bāsh thā jañgal se shahr tak

ham apnā bojh nafs ke ghoḌoñ pe laa.e haiñ

duniyā meñ itne shor-sharābe ke bāvajūd

jo bolte nahīñ haiñ vahī ahl-e-rā.e haiñ

ham sar-phiroñ kā zauq-e-sukūnat na pūchhiye

jab shahr tañg ho ga.e sahrā basā.e haiñ

lagtā hai apnā zehn bhī apnā nahīñ 'nasīm'

ḳhud-sāḳhta ḳhayāl bhī jaise parā.e haiñ

kis burj mein falak ne sitare milae hain

dast-e-shab-e-firaq mein sae hi sae hain

gulzar-e-zindagi ke hain gul-dan ke nahin

ye phul kar-KHana-e-qudarat se aae hain

KHasta hue tane to jaDen phuTne lagin

peDon ne apne apne badan phir ugae hain

saman-e-bud-o-bash tha jangal se shahr tak

hum apna bojh nafs ke ghoDon pe lae hain

duniya mein itne shor-sharabe ke bawajud

jo bolte nahin hain wahi ahl-e-rae hain

hum sar-phiron ka zauq-e-sukunat na puchhiye

jab shahr tang ho gae sahra basae hain

lagta hai apna zehn bhi apna nahin 'nasim'

KHud-saKHta KHayal bhi jaise parae hain