kis etidal mein hai hulara zamin ka

kis e'tidāl meñ hai hulārā zamīn kā

TuuTe na inhimāk ḳhudārā zamīn kā

zer-e-zamīñ mile na mile kis ko kyā ḳhabar

ik TukḌā chāhiye hai hamārā zamīn kā

vo niist chāhe aur ye māñge hai hast ko

mumkin kahāñ ḳhalā se guzārā zamīn kā

aise laTaktā rahtā hai sar par har ek vaqt

ye āsmāñ ho jaise ḳhasāra zamīn kā

sayyārgāñ na dekh haqārat se is taraf

tujh ko na kar de raakh sharāra zamīn kā

saaya bhī jal rahā hai daraḳhtoñ kī oT meñ

is baar bhī na samjhe ishārā zamīn kā

koī kashish kahīñ kī mujhe khīñchtī ga.ī

phir haath meñ rahā na kinārā zamīn kā

ik chāñd ḳhaak par hai hamārā falak-maqām

ik phuul āsmāñ pe hamārā zamīn kā

bāñhoñ meñ dekh charḳh-e-kuhan ghūmte hue

dilchasp ho gayā hai nazāra zamīn kā

aisā na ho falak kī hathelī se jā gire

gardish meñ āj-kal hai sitārā zamīn kā

kis e'tidal mein hai hulara zamin ka

TuTe na inhimak KHudara zamin ka

zer-e-zamin mile na mile kis ko kya KHabar

ek TukDa chahiye hai hamara zamin ka

wo nist chahe aur ye mange hai hast ko

mumkin kahan KHala se guzara zamin ka

aise laTakta rahta hai sar par har ek waqt

ye aasman ho jaise KHasara zamin ka

sayyargan na dekh haqarat se is taraf

tujh ko na kar de rakh sharara zamin ka

saya bhi jal raha hai daraKHton ki oT mein

is bar bhi na samjhe ishaara zamin ka

koi kashish kahin ki mujhe khinchti gai

phir hath mein raha na kinara zamin ka

ek chand KHak par hai hamara falak-maqam

ek phul aasman pe hamara zamin ka

banhon mein dekh charKH-e-kuhan ghumte hue

dilchasp ho gaya hai nazara zamin ka

aisa na ho falak ki hatheli se ja gire

gardish mein aaj-kal hai sitara zamin ka