kis ehtiyat se hum raushni mein Dub gae

kis ehtiyāt se ham raushnī meñ Duub ga.e

khulī jo aañkh to phir tīrgī meñ Duub ga.e

ajiib taur se raas aaya umr kā dariyā

isī se paar lage the usī meñ Duub ga.e

vo jāhilāna takallum pe sarfarāz huā

ham apne lahje kī shā.istagī meñ Duub ga.e

badalnā hogā ab andāz apne rone kā

tamām bachche achānak hañsī meñ Duub ga.e

ajiib chiiz thī rangīnī-e-fareb-e-bahār

jidhar nigāh uThī sādgī meñ Duub ga.e

samajh meñ aaya na un ko shanāvarī kā mizāj

samundaroñ se nikal kar nadī meñ Duub ga.e

vo jin ke dam se ujāloñ kā thā bharam ai 'shān'

ġhazab huā ki vahī tīrgī meñ Duub ga.e

kis ehtiyat se hum raushni mein Dub gae

khuli jo aankh to phir tirgi mein Dub gae

ajib taur se ras aaya umr ka dariya

isi se par lage the usi mein Dub gae

wo jahilana takallum pe sarfaraaz hua

hum apne lahje ki shaistagi mein Dub gae

badalna hoga ab andaz apne rone ka

tamam bachche achanak hansi mein Dub gae

ajib chiz thi rangini-e-fareb-e-bahaar

jidhar nigah uThi sadgi mein Dub gae

samajh mein aaya na un ko shanawari ka mizaj

samundaron se nikal kar nadi mein Dub gae

wo jin ke dam se ujalon ka tha bharam ai 'shan'

ghazab hua ki wahi tirgi mein Dub gae