kis hunar-mandi se qatl-e-tirgi karte hain log

kis hunar-mandī se qatl-e-tīrgī karte haiñ log

merā kāshāna jalā kar raushnī karte haiñ log

jaane kaisā shahr hai ye maut kī āġhosh meñ

rah ke bhī har vaqt jashn-e-zindagī karte haiñ log

maiñ fasīl-e-shab pe raushan kartā huuñ dil kā charāġh

garche mere rāste meñ tīrgī karte haiñ log

yā-ilāhī gulsitān-e-zindagī kī ḳhair ho

jo nahīñ karnā hai ab aksar vahī karte haiñ log

dostī kā gir gayā me.aar kitnā āj-kal

sirf maqsad ke liye ab dostī karte haiñ log

mujh ko kyā ma.alūm lafzoñ ke baratne kā hunar

mujh se behtar shahr-e-fan meñ shā.erī karte haiñ log

zindagī ke haath se majbūr ho kar āj-kal

ḳhud-kushī har vaqt 'sābir-jauharī’ karte haiñ log

kis hunar-mandi se qatl-e-tirgi karte hain log

mera kashana jala kar raushni karte hain log

jaane kaisa shahr hai ye maut ki aaghosh mein

rah ke bhi har waqt jashn-e-zindagi karte hain log

main fasil-e-shab pe raushan karta hun dil ka charagh

garche mere raste mein tirgi karte hain log

ya-ilahi gulsitan-e-zindagi ki KHair ho

jo nahin karna hai ab aksar wahi karte hain log

dosti ka gir gaya mear kitna aaj-kal

sirf maqsad ke liye ab dosti karte hain log

mujh ko kya malum lafzon ke baratne ka hunar

mujh se behtar shahr-e-fan mein shaeri karte hain log

zindagi ke hath se majbur ho kar aaj-kal

KHud-kushi har waqt 'sabir-jauhari’ karte hain log