kis jagah chhoDa tha wo tir-o-kaman yaad nahin

kis jagah chhoḌā thā vo tīr-o-kamāñ yaad nahīñ

thā kahīñ sāhil-e-dariyā pe makāñ yaad nahīñ

jaane kis samt se jaage the vo sho.ale ghar meñ

jaane kis samt se niklā thā dhuāñ yaad nahīñ

mahke ḳhushbū se tirī kitne darīche dil ke

kis ne dī phir mire lafzoñ ko zabāñ yaad nahīñ

DhūñD kar laa.e koī ab vo ḳhalish pahlī sī

kho ga.e the tirī āñkhoñ meñ kahāñ yaad nahīñ

vaqt kī god bhī āseb-zada lagtī thī

amn kī ham ko koī bhī to azaañ yaad nahīñ

is qadar hosh hai ki sāmne chehra thā vahī

gum hue phir isī vahshat meñ kahāñ yaad nahīñ

chāroñ jānib hai vahī dard kā sahrā 'tālib'

ham faqīroñ ko koī kāhkashāñ yaad nahīñ

kis jagah chhoDa tha wo tir-o-kaman yaad nahin

tha kahin sahil-e-dariya pe makan yaad nahin

jaane kis samt se jage the wo shoale ghar mein

jaane kis samt se nikla tha dhuan yaad nahin

mahke KHushbu se teri kitne dariche dil ke

kis ne di phir mere lafzon ko zaban yaad nahin

DhunD kar lae koi ab wo KHalish pahli si

kho gae the teri aankhon mein kahan yaad nahin

waqt ki god bhi aaseb-zada lagti thi

amn ki hum ko koi bhi to azan yaad nahin

is qadar hosh hai ki samne chehra tha wahi

gum hue phir isi wahshat mein kahan yaad nahin

chaaron jaanib hai wahi dard ka sahra 'talib'

hum faqiron ko koi kahkashan yaad nahin