kis ka shoala jal raha hai shoalagi se mawara

kis kā sho.ala jal rahā hai sho.alagī se māvarā

kaun raushan hai bhalā is raushnī se māvarā

jiite jī to kuchh nahīñ dekhā nazar se haañ magar

hairateñ DhūñDā kiye is hairatī se māvarā

kaun sā aalam hai mālik tere aalam meñ nihāñ

kaun sajde meñ chhupā hai bandagī se māvarā

koī to batlā.egā aage kahāñ muḌtī hai raah

koī to hogī zamīñ us malgajī se māvarā

baat jiine kī adā tak ḳhūb-sūrat hai magar

zindagī kuchh aur hai is zindagī se māvarā

ḳhāk-basta phir rahā hai kaun sī bastī meñ dil

kaun āḳhir ḳhasta-jāñ hai ḳhastagī se māvarā

ik nagar tarsā huā hai aur sahrā hai tavīl

aur ik naddī hai koī tishnagī se māvarā

kab se ḳhālī haath hai yaañ ek ḳhilqat ishq kī

ham bhī ho jā.eñge ek din bebasī se māvarā

in farāvāñ ne.amatoñ aur barkatoñ ke bāvajūd

koī muflis chal diyā hai muflisī se māvarā

apnī duniyā meñ agar phailī hai tārīkī to kyā

din kahīñ niklā to hogā tīrgī se māvarā

kis ka shoala jal raha hai shoalagi se mawara

kaun raushan hai bhala is raushni se mawara

jite ji to kuchh nahin dekha nazar se han magar

hairaten DhunDa kiye is hairati se mawara

kaun sa aalam hai malik tere aalam mein nihan

kaun sajde mein chhupa hai bandagi se mawara

koi to batlaega aage kahan muDti hai rah

koi to hogi zamin us malgaji se mawara

baat jine ki ada tak KHub-surat hai magar

zindagi kuchh aur hai is zindagi se mawara

KHak-basta phir raha hai kaun si basti mein dil

kaun aaKHir KHasta-jaan hai KHastagi se mawara

ek nagar tarsa hua hai aur sahra hai tawil

aur ek naddi hai koi tishnagi se mawara

kab se KHali hath hai yan ek KHilqat ishq ki

hum bhi ho jaenge ek din bebasi se mawara

in farawan neamaton aur barkaton ke bawajud

koi muflis chal diya hai muflisi se mawara

apni duniya mein agar phaili hai tariki to kya

din kahin nikla to hoga tirgi se mawara