kis ki nazar se utre kise bha rahe hain hum

kis kī nazar se utre kise bhā rahe haiñ ham

apne kiye pe aaj bhī pachhtā rahe haiñ ham

hoñToñ se apne chuum ke tum jis meñ rakh ga.e

kuchh din se us kitāb meñ murjhā rahe haiñ ham

matlab ke is jahān meñ apnā koī to hai

dil ko isī ḳhayāl se bahlā rahe haiñ ham

dekheñ kisī ke sāmne khul kar na aa.ine

apnā samajh ke aap ko samjhā rahe haiñ ham

jhagḌā hamārā ishq se pahle bhī ḳhuub thā

muñh lagne nā-murād ke phir jā rahe haiñ ham

ash.ār meñ sameT ke gulshan kā rūp-rang

saare jahāñ meñ ishq ko phailā rahe haiñ ham

dil meñ biThā ke rakhnā yahī baat jān-e-man

pahle bhī ik dafa tirī duniyā rahe haiñ ham

bulbul ne shāḳh-e-dil pe banāyā hai ek ghar

ġhazloñ se is makān ko mahkā rahe haiñ ham

'sohil' hamāre kaam se kuchh log ḳhush na the

ab aa ke is maqām pe itrā rahe haiñ ham

kis ki nazar se utre kise bha rahe hain hum

apne kiye pe aaj bhi pachhta rahe hain hum

honTon se apne chum ke tum jis mein rakh gae

kuchh din se us kitab mein murjha rahe hain hum

matlab ke is jahan mein apna koi to hai

dil ko isi KHayal se bahla rahe hain hum

dekhen kisi ke samne khul kar na aaine

apna samajh ke aap ko samjha rahe hain hum

jhagDa hamara ishq se pahle bhi KHub tha

munh lagne na-murad ke phir ja rahe hain hum

ashaar mein sameT ke gulshan ka rup-rang

sare jahan mein ishq ko phaila rahe hain hum

dil mein biTha ke rakhna yahi baat jaan-e-man

pahle bhi ek dafa teri duniya rahe hain hum

bulbul ne shaKH-e-dil pe banaya hai ek ghar

ghazlon se is makan ko mahka rahe hain hum

'sohil' hamare kaam se kuchh log KHush na the

ab aa ke is maqam pe itra rahe hain hum