kis kis lau par kaThi bandhi kis kis ko di bag

kis kis lau par kāThī bāñdhī kis kis ko dī baag

tum kyā jaano ham ne qaabū kī hai kaisī aag

das poreñ betābī se phailā.eñ lākhoñ jaal

jab raushan parde par ghaat lagā.e koī ghaag

piilī paḌte paḌte maiñ sone meñ Dhaltī jā.ūñ

phir pahre par aa baiThe vo kalġhī vaalā naag

label vo jaisā bhī oḌhe ho jaa.e ehsās

is botal meñ jin hai is kā uḌ jaanā hai kaag

phir paanī meñ Daal madhānī baiTh ga.e haiñ dost

phir merī roTī par chupḌeñge ye phīke jhaag

is bastī kī chiknī miTTī khole nāhīñ bhed

kis darvāze par dastak se khul sakte haiñ bhaag

sarsoñ ke phūloñ meñ ek gulābī lahr chale

jab rañgoñ se rūThī naarī toḌan aa.e saag

kis chullū meñ Daale jaa.eñ saat suroñ ke ashk

kin hāthoñ meñ āḳhir ThanDā hogā dīpak raag

kis kis lau par kaThi bandhi kis kis ko di bag

tum kya jaano hum ne qabu ki hai kaisi aag

das poren betabi se phailaen lakhon jal

jab raushan parde par ghat lagae koi ghag

pili paDte paDte main sone mein Dhalti jaun

phir pahre par aa baiThe wo kalghi wala nag

label wo jaisa bhi oDhe ho jae ehsas

is botal mein jin hai is ka uD jaana hai kag

phir pani mein Dal madhani baiTh gae hain dost

phir meri roTi par chupDenge ye phike jhag

is basti ki chikni miTTi khole nahin bhed

kis darwaze par dastak se khul sakte hain bhag

sarson ke phulon mein ek gulabi lahr chale

jab rangon se ruThi nari toDan aae sag

kis chullu mein Dale jaen sat suron ke ashk

kin hathon mein aaKHir ThanDa hoga dipak rag