kis ko dikhlaenge wo naz-o-ada mere baad

kis ko dikhlā.eñge vo nāz-o-adā mere ba.ad

hogī kis par ye bhalā mashq-e-jafā mere ba.ad

dekhiye aap bhī afsurda raheñge aksar

yaar aa jā.egī jab merī vafā mere ba.ad

zīnat-e-husn baḌhī ḳhūn-e-jigar se mere

phīkā paḌ jā.egā ye rang-e-hinā mere ba.ad

bārhā arsh-e-barīñ nāla-e-shab se kāñpā

arsh tak jā.egī kab āh-e-rasā mere ba.ad

maiñ chalā jā.ūñgā mahfil se na hoñ aap ḳhafā

kis pe phir hoñge magar aap ḳhafā mere ba.ad

nau-giraftār-e-balā hogā na mujh sā koī

kaun chāhegā tujhe zulf-e-dotā mere ba.ad

uTh gayā ālam-e-fānī se ye kah kar 'aslam'

dekhiye kis kī ab aatī hai qazā mere ba.ad

kis ko dikhlaenge wo naz-o-ada mere baad

hogi kis par ye bhala mashq-e-jafa mere baad

dekhiye aap bhi afsurda rahenge aksar

yar aa jaegi jab meri wafa mere baad

zinat-e-husn baDhi KHun-e-jigar se mere

phika paD jaega ye rang-e-hina mere baad

barha arsh-e-barin nala-e-shab se kanpa

arsh tak jaegi kab aah-e-rasa mere baad

main chala jaunga mahfil se na hon aap KHafa

kis pe phir honge magar aap KHafa mere baad

nau-giraftar-e-bala hoga na mujh sa koi

kaun chahega tujhe zulf-e-dota mere baad

uTh gaya aalam-e-fani se ye kah kar 'aslam'

dekhiye kis ki ab aati hai qaza mere baad