kis ko KHayal-e-gesu-o-zulf-e-dota nahin

kis ko ḳhayāl-e-gesū-o-zulf-e-dotā nahīñ

duniyā meñ kaun hai jo asīr-e-balā nahīñ

sun kar savāl vo mirā haañ kahne hī ko the

shoḳhī ne un se pahle hī vaañ kah diyā nahīñ

kahtā hai haath rakh ke mire siine par vo shoḳh

kambaḳht ab bhī dard-e-jigar kam hai yā nahīñ

jis tafta dil ko taakā vahīñ said kar liyā

tīr-e-nigāh-e-nāz kabhī chūktā nahīñ

kis se hijāb ḳhāna-e-ḳhalvat meñ karte ho

ik maiñ huuñ tum ho aur koī dūsrā nahīñ

pāmāl kar rahe haiñ mirā dil huzūr kyoñ

kyā jānte nahīñ haiñ ye ghar aap kā nahīñ

sog-e-raqīb meñ ye tire dushmanoñ kā haal

āñkhoñ meñ surma hāthoñ meñ rang-e-hinā nahīñ

ā.īna dekh kar tumheñ kyoñ aa gayā hijāb

tum hī ho is meñ aur koī dūsrā nahīñ

'sābir' jo zulf-e-yār ko kahte ho mushk-fām

mazmūn tum ko aur koī sūjhtā nahīñ

'sābir' butoñ ko tū ne dil-o-dīñ jo de diyā

roz-e-jazā kā ḳhauf bhī mard-e-ḳhudā nahīñ

kis ko KHayal-e-gesu-o-zulf-e-dota nahin

duniya mein kaun hai jo asir-e-bala nahin

sun kar sawal wo mera han kahne hi ko the

shoKHi ne un se pahle hi wan kah diya nahin

kahta hai hath rakh ke mere sine par wo shoKH

kambaKHt ab bhi dard-e-jigar kam hai ya nahin

jis tafta dil ko taka wahin said kar liya

tir-e-nigah-e-naz kabhi chukta nahin

kis se hijab KHana-e-KHalwat mein karte ho

ek main hun tum ho aur koi dusra nahin

pamal kar rahe hain mera dil huzur kyon

kya jaante nahin hain ye ghar aap ka nahin

sog-e-raqib mein ye tere dushmanon ka haal

aankhon mein surma hathon mein rang-e-hina nahin

aaina dekh kar tumhein kyon aa gaya hijab

tum hi ho is mein aur koi dusra nahin

'sabir' jo zulf-e-yar ko kahte ho mushk-fam

mazmun tum ko aur koi sujhta nahin

'sabir' buton ko tu ne dil-o-din jo de diya

roz-e-jaza ka KHauf bhi mard-e-KHuda nahin