kis liye dasht mein ghar koi banaya jae

kis liye dasht meñ ghar koī banāyā jaa.e

paas kyā hai jo fasīloñ meñ chhupāyā jaa.e

maiñ jazīra huuñ mirī pyaas bujhāne ke liye

ik samundar mire atrāf bichhāyā jaa.e

kisī sahrā meñ bahā jaa.e nadī kī sūrat

abr ban kar kisī kohsār pe chhāyā jaa.e

roz chaTke kisī ummīd kā ġhuncha dil meñ

roz palkoñ pe koī ḳhvāb sajāyā jaa.e

dukh se jalte hue is daur meñ jiine se baḌā

mo'jiza kaunsā duniyā ko dikhāyā jaa.e

baat kyā hai ki ba-īñ-ḳhvārī-o-āshufta-dilī

chhoḌ kar ham se tirā shahr na jaayā jaa.e

raushnī huuñ to kahā jaa.e charāġh-e-manzil

sang huuñ to mujhe raste se haTāyā jaa.e

pūchhte rahte haiñ ye log na jaane kyā kyā

ham se to naam bhī apnā na batāyā jaa.e

rah ga.ī hai yahī ik ham-safarī kī sūrat

bojh ho ḳhvāh kisī kā bhī uThāyā jaa.e

haa.e ye dhuup machātā huā sāvan jis se

kisī chaTTān pe sabza na ugāyā jaa.e

aaj mar jā.ūñ agar maiñ to 'ajab kyā 'ḳhāvar'

sau baras baa'd mirā sog manāyā jaa.e

kis liye dasht mein ghar koi banaya jae

pas kya hai jo fasilon mein chhupaya jae

main jazira hun meri pyas bujhane ke liye

ek samundar mere atraf bichhaya jae

kisi sahra mein baha jae nadi ki surat

abr ban kar kisi kohsar pe chhaya jae

roz chaTke kisi ummid ka ghuncha dil mein

roz palkon pe koi KHwab sajaya jae

dukh se jalte hue is daur mein jine se baDa

mo'jiza kaunsa duniya ko dikhaya jae

baat kya hai ki ba-in-KHwari-o-ashufta-dili

chhoD kar hum se tera shahr na jaya jae

raushni hun to kaha jae charagh-e-manzil

sang hun to mujhe raste se haTaya jae

puchhte rahte hain ye log na jaane kya kya

hum se to nam bhi apna na bataya jae

rah gai hai yahi ek ham-safari ki surat

bojh ho KHwah kisi ka bhi uThaya jae

hae ye dhup machata hua sawan jis se

kisi chaTTan pe sabza na ugaya jae

aaj mar jaun agar main to 'ajab kya 'KHawar'

sau baras ba'd mera sog manaya jae