kis liye gosha-e-aKHbar ye Khaali jae

kis liye gosha-e-aḳhbār ye ḳhālī jaa.e

ik ḳhabar apnī hī shohrat kī banā lī jaa.e

kuchh to āñkhoñ ko nazar aa.e jahān-e-dīgar

kuchh to ab raushnī-e-shauq baḌhā lī jaa.e

dekheñ ahbāb pe kyā radd-e-amal hotā hai

apne mar jaane kī afvāh uḌā lī jaa.e

ham faqīroñ ke liye haath kā apnā takiya

chādar-e-ḳhāk kahīñ par bhī bichhā lī jaa.e

daulat-e-ishq se māmūr hai takiya merā

'ziyā' ahbāb ko ye baat batā lī jaa.e

kis liye gosha-e-aKHbar ye KHali jae

ek KHabar apni hi shohrat ki bana li jae

kuchh to aankhon ko nazar aae jahan-e-digar

kuchh to ab raushni-e-shauq baDha li jae

dekhen ahbab pe kya radd-e-amal hota hai

apne mar jaane ki afwah uDa li jae

hum faqiron ke liye hath ka apna takiya

chadar-e-KHak kahin par bhi bichha li jae

daulat-e-ishq se mamur hai takiya mera

'ziya' ahbab ko ye baat bata li jae