kis liye puchhte hain jabki sabab jaante hain

kis liye pūchhte haiñ jabki sabab jānte haiñ

log jo hāl-e-dil-e-chāratalab jānte haiñ

kis kī lau Thahartī hai kaun se bujhte haiñ charāġh

ham naqībān-e-havā sab ke nasab jānte haiñ

āshnā laakh mileñ tujh se qarīñ bhī huuñ bahut

jānñe vaale bhī ai dil tujhe kab jānte haiñ

kis ke dhoke meñ raheñ muntazir-e-ḳhvāb-e-hasīñ

ham bhī saada haiñ kahāñ mohlat-e-shab jānte haiñ

saaya tak rakhte haiñ malhūz dabistān-e-vafā

aañkh uThā.eñ bhī to ādāb-o-adab jānte haiñ

kaun kaTh-putlī hai aivān-e-tamāshā kis kā

pas-e-parda to haqīqat yahāñ sab jānte haiñ

kis liye puchhte hain jabki sabab jaante hain

log jo haal-e-dil-e-chaaratalab jaante hain

kis ki lau Thaharti hai kaun se bujhte hain charagh

hum naqiban-e-hawa sab ke nasab jaante hain

aashna lakh milen tujh se qarin bhi hun bahut

jaanne wale bhi ai dil tujhe kab jaante hain

kis ke dhoke mein rahen muntazir-e-KHwab-e-hasin

hum bhi sada hain kahan mohlat-e-shab jaante hain

saya tak rakhte hain malhuz dabistan-e-wafa

aankh uThaen bhi to aadab-o-adab jaante hain

kaun kaTh-putli hai aiwan-e-tamasha kis ka

pas-e-parda to haqiqat yahan sab jaante hain