kis lutf se mahfil mein biThae gae hum log

kis lutf se mahfil meñ biThā.e ga.e ham log

kyā raaz thā ḳhātir meñ jo laa.e ga.e ham log

sham.eñ tirī yādoñ kī jalā.e ga.e ham log

ashkoñ ke ḳhazāne the luTā.e ga.e ham log

sar naqsh-e-kaf-e-pā pe jhukā.e ga.e ham log

yuuñ rasm-e-vafā un se banā.e ga.e ham log

ġhairoñ ne murattab kiye afsāne sitam ke

afsānoñ ke unvān banā.e ga.e ham log

haiñ morid-e-ilzām hamīñ terī nazar meñ

duniyā kī ḳhatāoñ pe satā.e ga.e ham log

go ham na rahe rah gayā afsāna hamārā

maazī kī tarah ho ga.e aa.e ga.e ham log

ham miT ga.e duniyā se to samjhī hameñ duniyā

kho.e ga.e ham log to paa.e ga.e ham log

achchhe rahe vo log jo bande the havas ke

ādāb-e-mohabbat meñ miTā.e ga.e ham log

kuchh aise gire 'saif' nigāhoñ se ham un kī

jis bazm meñ bhī pahuñche uThā.e ga.e ham log

kis lutf se mahfil mein biThae gae hum log

kya raaz tha KHatir mein jo lae gae hum log

shamen teri yaadon ki jalae gae hum log

ashkon ke KHazane the luTae gae hum log

sar naqsh-e-kaf-e-pa pe jhukae gae hum log

yun rasm-e-wafa un se banae gae hum log

ghairon ne murattab kiye afsane sitam ke

afsanon ke unwan banae gae hum log

hain morid-e-ilzam hamin teri nazar mein

duniya ki KHataon pe satae gae hum log

go hum na rahe rah gaya afsana hamara

mazi ki tarah ho gae aae gae hum log

hum miT gae duniya se to samjhi hamein duniya

khoe gae hum log to pae gae hum log

achchhe rahe wo log jo bande the hawas ke

aadab-e-mohabbat mein miTae gae hum log

kuchh aise gire 'saif' nigahon se hum un ki

jis bazm mein bhi pahunche uThae gae hum log