kis ne wahshi ko sikhaya ki tu aisa karna

kis ne vahshī ko sikhāyā ki tū aisā karnā

kuchh na kuchh ḳhaak pe likh likh ke miTāyā karnā

vo mirā kūcha-e-jānāñ meñ saverā karnā

raat bhar us kā darāroñ se vo jhāñkā karnā

ye kahāñ lā ke mujhe chhoḌ gayā josh-e-junūn

aap hī aap ḳhud apne ko pukārā karnā

ham to bas ek ko hī sajda kiyā karte haiñ

kaun kis kis kā pujārī hai hameñ kyā karnā

kyoñ na raushan hoñ tirī yaad se zaḳhmoñ ke charāġh

kaam hī sham.a kā hai ghar meñ ujālā karnā

ek din aane kā aur ek hai din jaane kā

isī do roz kī mohlat meñ hai kyā kyā karnā

bol kis dil se bhulā.ūñ jo bhulā.ūñ bhī tujhe

terā chhup-chhup ke vo aksar mujhe dekhā karnā

tū masīhā hai shifā detā hai tū hī sab ko

hai ye da.avā to mire zaḳhm ko achchhā karnā

us ke jalvoñ meñ the kho.e hue aise ki 'shafaq'

bhuul hī to ga.e ham arz-e-tamannā karnā

kis ne wahshi ko sikhaya ki tu aisa karna

kuchh na kuchh KHak pe likh likh ke miTaya karna

wo mera kucha-e-jaanan mein sawera karna

raat bhar us ka dararon se wo jhanka karna

ye kahan la ke mujhe chhoD gaya josh-e-junun

aap hi aap KHud apne ko pukara karna

hum to bas ek ko hi sajda kiya karte hain

kaun kis kis ka pujari hai hamein kya karna

kyon na raushan hon teri yaad se zaKHmon ke charagh

kaam hi shama ka hai ghar mein ujala karna

ek din aane ka aur ek hai din jaane ka

isi do roz ki mohlat mein hai kya kya karna

bol kis dil se bhulaun jo bhulaun bhi tujhe

tera chhup-chhup ke wo aksar mujhe dekha karna

tu masiha hai shifa deta hai tu hi sab ko

hai ye dawa to mere zaKHm ko achchha karna

us ke jalwon mein the khoe hue aise ki 'shafaq'

bhul hi to gae hum arz-e-tamanna karna