kis or le chali hai hawa-e-numu mujhe

kis or le chalī hai havā-e-numū mujhe

miltā hai gām-gām ik āshufta-rau mujhe

kahnā to aur kuchh thā dam-e-guftugū mujhe

ik or samt Daal ga.e rang-o-bū mujhe

donoñ hī dard-kesh the donoñ hī besh the

maiñ tujh ko kam samajhtā rahā aur tū mujhe

bazm-e-numūd-o-nām sajī shor sā uThā

maiñ chal diyā ki raas na thī hāo-hū mujhe

'aḳhtar' baḌī kaḌī thī masāfat aur us ke baad

mujh par khulā ki apnī hī thī justujū mujhe

kis or le chali hai hawa-e-numu mujhe

milta hai gam-gam ek aashufta-rau mujhe

kahna to aur kuchh tha dam-e-guftugu mujhe

ek or samt Dal gae rang-o-bu mujhe

donon hi dard-kesh the donon hi besh the

main tujh ko kam samajhta raha aur tu mujhe

bazm-e-numud-o-nam saji shor sa uTha

main chal diya ki ras na thi hao-hu mujhe

'aKHtar' baDi kaDi thi masafat aur us ke baad

mujh par khula ki apni hi thi justuju mujhe