kis qadar masala-e-sham-o-sahar badla hai

kis qadar mas.ala-e-shām-o-sahar badlā hai

jab zarā zāviya-e-fikr-o-nazar badlā hai

samt-e-manzil kā ta.ayyun nahīñ do gaam kī baat

kitne moḌ aa.e haiñ jab tarz-e-safar badlā hai

apnī āvāz pe ham chauñk uThe haiñ ḳhud bhī

ik zarā lahja-e-ehsās agar badlā hai

dasht meñ bhī kabhī is tarah na jī lagtā thā

ab ke dīvāngī badlī hai ki ghar badlā hai

aa gayā hai rasan-o-dār ke mā'mūl meñ farq

jab kabhī zābta-e-gardan-o-sar badlā hai

ab vo yak-rañgī-e-māhaul kī talḳhī to nahīñ

ham ne mai badlī na ho jaam magar badlā hai

inqalāb aayā hai is tarah bhī ghar meñ aksar

dar se dīvār na dīvār se dar badlā hai

kis qadar masala-e-sham-o-sahar badla hai

jab zara zawiya-e-fikr-o-nazar badla hai

samt-e-manzil ka tayyun nahin do gam ki baat

kitne moD aae hain jab tarz-e-safar badla hai

apni aawaz pe hum chaunk uThe hain KHud bhi

ek zara lahja-e-ehsas agar badla hai

dasht mein bhi kabhi is tarah na ji lagta tha

ab ke diwangi badli hai ki ghar badla hai

aa gaya hai rasan-o-dar ke ma'mul mein farq

jab kabhi zabta-e-gardan-o-sar badla hai

ab wo yak-rangi-e-mahaul ki talKHi to nahin

hum ne mai badli na ho jam magar badla hai

inqalab aaya hai is tarah bhi ghar mein aksar

dar se diwar na diwar se dar badla hai