kis qayamat ka adakar chhupa hai mujh mein

kis qayāmat kā adākār chhupā hai mujh meñ

merā hī hāshiya-bardār chhupā hai mujh meñ

merī tā.īd ke asbāb banāne vaalo

ḳhud mirī zaat kā inkār chhupā hai mujh meñ

bas tire ġham ko samajhtā hai ibādat apnī

vo jo ik terā azādār chhupā hai mujh meñ

be-niyāzī mirī duniyā se batātī hai mujhe

ho na ho koī samajhdār chhupā hai mujh meñ

aa zuleḳhā mirī āñkhoñ se mire dil meñ utar

dekh ik misr kā bāzār chhupā hai mujh meñ

merī fitrat hai zamāne se mohabbat karnā

log kahte haiñ ki makkār chhupā hai mujh meñ

jis ne aadam ko nikalvāyā thā jannat se kabhī

bas vahī ek gunahgār chhupā hai mujh meñ

tujh se jhagḌūñ to muqābil mire aa jaatā hai

aisā ik terā taraf-dār chhupā hai mujh meñ

ye alag baat ki zāhir nahīñ hotā hai kabhī

vaise ik shaḳhs mazedār chhupā hai mujh meñ

mere bātin meñ jo har samt hai ḳhushbū me.arāj

ye sabab hai ki mirā yaar chhupā hai mujh meñ

kis qayamat ka adakar chhupa hai mujh mein

mera hi hashiya-bardar chhupa hai mujh mein

meri taid ke asbab banane walo

KHud meri zat ka inkar chhupa hai mujh mein

bas tere gham ko samajhta hai ibaadat apni

wo jo ek tera azadar chhupa hai mujh mein

be-niyazi meri duniya se batati hai mujhe

ho na ho koi samajhdar chhupa hai mujh mein

aa zuleKHa meri aankhon se mere dil mein utar

dekh ek misr ka bazar chhupa hai mujh mein

meri fitrat hai zamane se mohabbat karna

log kahte hain ki makkar chhupa hai mujh mein

jis ne aadam ko nikalwaya tha jannat se kabhi

bas wahi ek gunahgar chhupa hai mujh mein

tujh se jhagDun to muqabil mere aa jata hai

aisa ek tera taraf-dar chhupa hai mujh mein

ye alag baat ki zahir nahin hota hai kabhi

waise ek shaKHs mazedar chhupa hai mujh mein

mere baatin mein jo har samt hai KHushbu mearaj

ye sabab hai ki mera yar chhupa hai mujh mein