kis rah gaya laila ka mahmil nahin malum

kis raah gayā lailā kā mahmil nahīñ ma.alūm

hai bādiya reg aur hameñ manzil nahīñ ma.alūm

maiñ hashr ke din da.avā ḳhuuñ kis se karūñgā

vo kushta huuñ jis kushta kā qātil nahīñ ma.alūm

nikleñ haiñ mire dil ke taḌapne meñ adā.eñ

hai kis kī nigāhoñ kā ye bismil nahīñ ma.alūm

thā rū-e-dil-e-ḳhasta to shab merī taraf ko

kab ho gayā mizhgāñ ke muqābil nahīñ ma.alūm

vo bahr hai dariyā-e-sarishk apnā ki jis kā

pahnā hī nazar aave hai sāhil nahīñ ma.alūm

mar jā.ūñ ki jiitā rahūñ maiñ hijr meñ tere

kis chiiz kā ḳhvāhāñ hai mirā dil nahīñ ma.alūm

āñkhoñ se guzārā hai jo yuuñ laḳht jigar kā

aate haiñ chale kis ke ye ghā.el nahīñ ma.alūm

kyā jāniye kyā us meñ tirī āñkhoñ ne dekhā

kyuuñ ho ga.iiñ ā.īne kī maa.il nahīñ ma.alūm

ai 'mus.hafī' afsos ki is hastī pe ham ko

tahsīl-e-vafādārī kā hāsil nahīñ ma.alūm

kis rah gaya laila ka mahmil nahin malum

hai baadiya reg aur hamein manzil nahin malum

main hashr ke din dawa KHun kis se karunga

wo kushta hun jis kushta ka qatil nahin malum

niklen hain mere dil ke taDapne mein adaen

hai kis ki nigahon ka ye bismil nahin malum

tha ru-e-dil-e-KHasta to shab meri taraf ko

kab ho gaya mizhgan ke muqabil nahin malum

wo bahr hai dariya-e-sarishk apna ki jis ka

pahna hi nazar aawe hai sahil nahin malum

mar jaun ki jita rahun main hijr mein tere

kis chiz ka KHwahan hai mera dil nahin malum

aankhon se guzara hai jo yun laKHt jigar ka

aate hain chale kis ke ye ghael nahin malum

kya jaaniye kya us mein teri aankhon ne dekha

kyun ho gain aaine ki mail nahin malum

ai 'mushafi' afsos ki is hasti pe hum ko

tahsil-e-wafadari ka hasil nahin malum