kis sadgi se chhoD diya hai bahaw par

kis sādgī se chhoḌ diyā hai bahāv par

hālāñ ki ham savār haiñ kāġhaz kī naav par

ham khilkhilā ke hañste haiñ har taaza ghaav par

kuchh log mo'tariz haiñ isī rakh-rakhāv par

ye aag bhī unhīñ kī lagā.ī huī to hai

jo log haath taap rahe haiñ alaav par

shahr-e-suḳhan kā tarz-e-tijārat 'ajīb hai

bikte haiñ fikr-o-fan bhī to miTTī ke bhaav par

rahzan haiñ ahl-e-qāfila haiñ aur gard-e-rāh

rahbar ko chhoḌ aa.e haiñ pichhle paḌāv par

ham bekasoñ pe itnā munāsib nahīñ hai zulm

chīñTā bhī kaaT letā hai aksar dabāv par

mumkin nahīñ hai 'ishq kī baazī ko haar jaa.eñ

dil jaisī chiiz ham ne lagā.ī hai daav par

vo shaḳhs zindagī kī bulandī na chhū sakā

vo jis kā saañs phuul gayā ho chaḌhāv par

'ishrat' ḳhulūs-o-mehr-o-vafā dostī kī laaj

biktī haiñ saarī chīzeñ yahāñ ek bhaav par

kis sadgi se chhoD diya hai bahaw par

haalan ki hum sawar hain kaghaz ki naw par

hum khilkhila ke hanste hain har taza ghaw par

kuchh log mo'tariz hain isi rakh-rakhaw par

ye aag bhi unhin ki lagai hui to hai

jo log hath tap rahe hain alaw par

shahr-e-suKHan ka tarz-e-tijarat 'ajib hai

bikte hain fikr-o-fan bhi to miTTi ke bhaw par

rahzan hain ahl-e-qafila hain aur gard-e-rah

rahbar ko chhoD aae hain pichhle paDaw par

hum bekason pe itna munasib nahin hai zulm

chinTa bhi kaT leta hai aksar dabaw par

mumkin nahin hai 'ishq ki bazi ko haar jaen

dil jaisi chiz hum ne lagai hai daw par

wo shaKHs zindagi ki bulandi na chhu saka

wo jis ka sans phul gaya ho chaDhaw par

'ishrat' KHulus-o-mehr-o-wafa dosti ki laj

bikti hain sari chizen yahan ek bhaw par