kis samt baDh rahe hain qadam kuchh pata nahin

kis samt baḌh rahe haiñ qadam kuchh patā nahīñ

tanhā safar kā mujh ko koī tajraba nahīñ

ai dil dayār-e-ġhair se vāpas chale-chalo

is shahr meñ milegā koī ham-navā nahīñ

kaisā ye marhala hai ki ik dūsre se ham

kahne ko āshnā haiñ magar āshnā nahīñ

ham ko hī tere baa'd na kuchh raas aa sakā

duniyā meñ dil lagāne ko varna thā kyā nahīñ

aise to TūTte nahīñ chāhat ke silsile

paiham bhulāne se to koī bhūltā nahīñ

ai ḳhvāb-e-ḳhush-numā tirī hasrat bajā magar

āñkhoñ kā ḳhush-numā.ī pe ab haq rahā nahīñ

dil ik ḳhizāñ-rasīda chaman hai ki jis meñ phir

tā-'umr aarzū kā koī gul khilā nahīñ

kis samt baDh rahe hain qadam kuchh pata nahin

tanha safar ka mujh ko koi tajraba nahin

ai dil dayar-e-ghair se wapas chale-chalo

is shahr mein milega koi ham-nawa nahin

kaisa ye marhala hai ki ek dusre se hum

kahne ko aashna hain magar aashna nahin

hum ko hi tere ba'd na kuchh ras aa saka

duniya mein dil lagane ko warna tha kya nahin

aise to TuTte nahin chahat ke silsile

paiham bhulane se to koi bhulta nahin

ai KHwab-e-KHush-numa teri hasrat baja magar

aankhon ka KHush-numai pe ab haq raha nahin

dil ek KHizan-rasida chaman hai ki jis mein phir

ta-'umr aarzu ka koi gul khila nahin