kis se puchhun ki khanDar sa ye badan kis ka hai

kis se pūchhūñ ki khañDar sā ye badan kis kā hai

koī mausam nahīñ jis meñ ye chaman kis kā hai

kuchh nahīñ farsh se tā-arsh ba-juz mauj-e-ġhubār

ye bayābān-e-shab-o-roz vatan kis kā hai

jhelte rahiye yahāñ rif.at-o-pastī kā azaab

ye zamīñ kis kī hai ye charḳh-e-kuhan kis kā hai

bārish-e-sang-e-malāmat se hai reza reza

nahīñ merā to ye ā.īna-e-fan kis kā hai

ho chuke masḳh mire apne ḳhad-o-ḳhāl tamām

'ramz' ye chehra-e-be-dāġh-o-shikan kis kā hai

kis se puchhun ki khanDar sa ye badan kis ka hai

koi mausam nahin jis mein ye chaman kis ka hai

kuchh nahin farsh se ta-arsh ba-juz mauj-e-ghubar

ye bayaban-e-shab-o-roz watan kis ka hai

jhelte rahiye yahan rifat-o-pasti ka azab

ye zamin kis ki hai ye charKH-e-kuhan kis ka hai

barish-e-sang-e-malamat se hai reza reza

nahin mera to ye aaina-e-fan kis ka hai

ho chuke masKH mere apne KHad-o-KHal tamam

'ramz' ye chehra-e-be-dagh-o-shikan kis ka hai