kise apna kahen hum kaun hai aaKHir yahan apna

kise apnā kaheñ ham kaun hai āḳhir yahāñ apnā

na ahl-e-kārvāñ apne na mīr-e-kārvāñ apnā

sunā.eñge usī ko qissa-e-dard-e-nihāñ apnā

vahī hai mehrbāñ apnā vahī hai rāz-dāñ apnā

na ab luTne kā andesha na kuchh parvāh manzil kī

ki ham tere havāle kar chuke haiñ kārvāñ apnā

bahār-e-jāvedāñ us sar-zamīñ kā tauf kartī hai

tire dīvāne Derā Daal dete haiñ jahāñ apnā

tamanna hai tumhāre paañv ke nīche rahūñ har dam

banā lo tum kabhī mujh ko bhī sang-e-āstāñ apnā

ham apnī jaan de deñge gulistāñ ko na chhoḌeñge

hameñ to jaan se pyārā hai 'nayyar' gulsitāñ apnā

kise apna kahen hum kaun hai aaKHir yahan apna

na ahl-e-karwan apne na mir-e-karwan apna

sunaenge usi ko qissa-e-dard-e-nihan apna

wahi hai mehrban apna wahi hai raaz-dan apna

na ab luTne ka andesha na kuchh parwah manzil ki

ki hum tere hawale kar chuke hain karwan apna

bahaar-e-jawedan us sar-zamin ka tauf karti hai

tere diwane Dera Dal dete hain jahan apna

tamanna hai tumhaare panw ke niche rahun har dam

bana lo tum kabhi mujh ko bhi sang-e-astan apna

hum apni jaan de denge gulistan ko na chhoDenge

hamein to jaan se pyara hai 'nayyar' gulsitan apna