kise dimagh ki uljhe tilism-e-zat ke sath

kise dimāġh ki uljhe tilism-e-zāt ke saath

ulajh rahā huuñ abhī terī kā.enāt ke saath

maiñ dīd-bān azal se jidhar bhī dekhtā thā

shikasta jaam paḌā hai ajā.ibāt ke saath

nikal gayā thā maiñ ik roz ḳhāk-dāñ kī taraf

guzar rahī hai shab o roz hādsāt ke saath

maiñ Duub Duub gayā be-nishāñ bhañvar meñ kahīñ

ḳhalā meñ raqs-kunāñ ghūmtī praat ke saath

muhīt-e-āb meñ har saañs Doltī nayyā

ġham-e-vajūd juḌā hai ġham-e-hayāt ke saath

vahī haram hai vahī but vahī pujārī haiñ

vahī diloñ kā ta.alluq hai somnāt ke saath

bikhar bikhar gayā ik mauj-e-rā.egāñ kī tarah

kisī kī jiit kā nashsha kisī kī maat ke saath

ḳhizāñ kī shaal meñ lipTe shajar pe parvāne

numū ke giit likhe rañg-e-mumkināt ke saath

qadam qadam pe ulajhnā vo be-sabab dil kā

hai ab to roz kā ma.amūl pāñch saat ke saath

hazār talḳh sahī phir bhī ḳhush-navā hai bahut

kisī charāġh kā lahja siyāh raat ke saath

sunā hai mausam-e-be-rañgi-e-zamāñ yaksar

badal gayā hai tirī chashm-e-iltifāt ke saath

maiñ ab bhī maazī kī galiyoñ meñ jā nikaltā huuñ

paḌī hai TaaT pe taḳhtī qalam davāt ke saath

bahut dinoñ vo rahā hai isī khañDar meñ muqīm

so rakh diyā hai ye dil bhī navādirāt ke saath

ye bastiyoñ pe ajab vahshatoñ kā mausam hai

numū-pazīr huā hai taġhayyurāt ke saath

maiñ kunj-e-zāt se niklā to yuuñ huā ki 'atā'

kuchh aur phail gayā ġham bhī shash-jahāt ke saath

kise dimagh ki uljhe tilism-e-zat ke sath

ulajh raha hun abhi teri kaenat ke sath

main did-ban azal se jidhar bhi dekhta tha

shikasta jam paDa hai ajaibaat ke sath

nikal gaya tha main ek roz KHak-dan ki taraf

guzar rahi hai shab o roz hadsat ke sath

main Dub Dub gaya be-nishan bhanwar mein kahin

KHala mein raqs-kunan ghumti praat ke sath

muhit-e-ab mein har sans Dolti nayya

gham-e-wajud juDa hai gham-e-hayat ke sath

wahi haram hai wahi but wahi pujari hain

wahi dilon ka talluq hai somnat ke sath

bikhar bikhar gaya ek mauj-e-raegan ki tarah

kisi ki jit ka nashsha kisi ki mat ke sath

KHizan ki shaal mein lipTe shajar pe parwane

numu ke git likhe rang-e-mumkinat ke sath

qadam qadam pe ulajhna wo be-sabab dil ka

hai ab to roz ka mamul panch sat ke sath

hazar talKH sahi phir bhi KHush-nawa hai bahut

kisi charagh ka lahja siyah raat ke sath

suna hai mausam-e-be-rangi-e-zaman yaksar

badal gaya hai teri chashm-e-iltifat ke sath

main ab bhi mazi ki galiyon mein ja nikalta hun

paDi hai TaT pe taKHti qalam dawat ke sath

bahut dinon wo raha hai isi khanDar mein muqim

so rakh diya hai ye dil bhi nawadiraat ke sath

ye bastiyon pe ajab wahshaton ka mausam hai

numu-pazir hua hai taghayyuraat ke sath

main kunj-e-zat se nikla to yun hua ki 'ata'

kuchh aur phail gaya gham bhi shash-jahat ke sath