kise hai fikr ki rang apna uD gaya kitna

kise hai fikr ki rang apnā uḌ gayā kitnā

ki pattharoñ se thā shīshe kā fāsla kitnā

simaT ke log guphāoñ meñ ho ga.e mahbūs

ḳhud apne ḳhuun kā lete bhī zā.iqa kitnā

safar tamām huā aur ye nahīñ ma.alūm

hamārī zaat se ham tak hai fāsla kitnā

na koī naqsh-e-qadam hai na koī hangāma

badal gayā hai tire ghar kā rāsta kitnā

ġhubār thā maiñ havā thī mire ta.āqub meñ

vo chāhtā bhī to mujh ko sameTtā kitnā

mirī nazar mujhe pahchānñe se qāsir hai

maiñ apnī zaat ke andar samā gayā kitnā

safar-guzār parindo mirī ḳhabar rakhnā

mujhe ḳhabar nahīñ rakhnā hai fāsla kitnā

'ayāz' abhī nahīñ ubhre nuqūsh-e-jism tamām

abhī se ḳhud ko vo pahchānñe lagā kitnā

kise hai fikr ki rang apna uD gaya kitna

ki pattharon se tha shishe ka fasla kitna

simaT ke log guphaon mein ho gae mahbus

KHud apne KHun ka lete bhi zaiqa kitna

safar tamam hua aur ye nahin malum

hamari zat se hum tak hai fasla kitna

na koi naqsh-e-qadam hai na koi hangama

badal gaya hai tere ghar ka rasta kitna

ghubar tha main hawa thi mere taaqub mein

wo chahta bhi to mujh ko sameTta kitna

meri nazar mujhe pahchanne se qasir hai

main apni zat ke andar sama gaya kitna

safar-guzar parindo meri KHabar rakhna

mujhe KHabar nahin rakhna hai fasla kitna

'ayaz' abhi nahin ubhre nuqush-e-jism tamam

abhi se KHud ko wo pahchanne laga kitna