kise KHabar thi ki zehn-o-dil mein ajib sa intishaar hoga

kise ḳhabar thī ki zehn-o-dil meñ ajiib sā intishār hogā

vo vaqt aa.egā be-yaqīnī kā chār-jānib ġhubār hogā

ye saaf zāhir hai zindagī meñ sukūñ kī hogī na koī sūrat

kahīñ ḳhizāñ kī ijāra-dārī kahīñ fareb-e-bahār hogā

yahāñ kā aa.iin hī ajab hai ki tarz-e-nau kā ye mai-kada hai

jo bekasoñ kā lahū piyegā vo mai-kashoñ meñ shumār hogā

na chheḌiye naġhma-e-mohabbat ki ye hai daur-e-fareb-kārī

diloñ kī ḳhush-rañg vādiyoñ meñ kudūratoñ kā ġhubār hogā

chale to ho 'arsh' rāh-e-haq par liye hue dil meñ azm lekin

jahāñ jahāñ bhī qadam paḌeñge vahīñ vahīñ ḳhārzār hogā

kise KHabar thi ki zehn-o-dil mein ajib sa intishaar hoga

wo waqt aaega be-yaqini ka chaar-jaanib ghubar hoga

ye saf zahir hai zindagi mein sukun ki hogi na koi surat

kahin KHizan ki ijara-dari kahin fareb-e-bahaar hoga

yahan ka aain hi ajab hai ki tarz-e-nau ka ye mai-kada hai

jo bekason ka lahu piyega wo mai-kashon mein shumar hoga

na chheDiye naghma-e-mohabbat ki ye hai daur-e-fareb-kari

dilon ki KHush-rang wadiyon mein kuduraton ka ghubar hoga

chale to ho 'arsh' rah-e-haq par liye hue dil mein azm lekin

jahan jahan bhi qadam paDenge wahin wahin KHarzar hoga