kisi bhi ajnabi se dil laga kar kya karenge hum

kisī bhī ajnabī se dil lagā kar kyā kareñge ham

ki ab ujḌe chaman meñ gul khilā kar kyā kareñge ham

haiñ ham TuuTe hue patte hameñ in mausamoñ se kyā

ḳhizāñ ke daur meñ bārish bulā kar kyā kareñge ham

bachā paa.e na lahroñ se kināroñ par makāñ apne

safīne phir samundar meñ chalā kar kyā kareñge ham

mohabbat meñ bahut puujā hai ham ne ek patthar ko

bhalā ab shīsh mandir meñ jhukā kar kyā kareñge ham

‘parastish’ 'ishq kā anjām jab mā'lūm hai ham ko

sunahre ḳhvāb āñkhoñ meñ sajā kar kyā kareñge ham

kisi bhi ajnabi se dil laga kar kya karenge hum

ki ab ujDe chaman mein gul khila kar kya karenge hum

hain hum TuTe hue patte hamein in mausamon se kya

KHizan ke daur mein barish bula kar kya karenge hum

bacha pae na lahron se kinaron par makan apne

safine phir samundar mein chala kar kya karenge hum

mohabbat mein bahut puja hai hum ne ek patthar ko

bhala ab shish mandir mein jhuka kar kya karenge hum

‘parastish’ 'ishq ka anjam jab ma'lum hai hum ko

sunahre KHwab aankhon mein saja kar kya karenge hum