kisi bhi lamha ghamon se najat hai hi nahin

kisī bhī lamha ġhamoñ se najāt hai hī nahīñ

hayāt kahte haiñ jis ko hayāt hai hī nahīñ

talāsh kījiye apnoñ meñ kaun qātil hai

hamāre qatl meñ ġhairoñ kā haath hai hī nahīñ

na chāñd taare na jugnū na chāñdnī kī qabā

maiñ raat kahtā huuñ jis ko vo raat hai hī nahīñ

mujhe to zahr hī piinā hai har zamāne meñ

mire nasīb meñ āb-e-hayāt hai hī nahīñ

sar-e-salīb jo maiñ hañs rahā huuñ kyoñ na hañsūñ

ḳhushī kā lamha hai ye ġham kī baat hai hī nahīñ

har ek samt tirā nuur hai jidhar dekhūñ

mire vajūd meñ merī to zaat hai hī nahīñ

hazāroñ log mile pyaar karne vaale hameñ

magar kisī meñ tumhārī sī baat hai hī nahīñ

vo mere paas hai phir bhī bahut akelā huuñ

maiñ us ke saath huuñ vo mere saath hai hī nahīñ

maiñ kyoñ udaas huuñ mat pūchiyegā is kā sabab

ajiib baat hai ki koī baat hai hī nahīñ

hamāre ishq meñ shāmil havas kahāñ thī miyāñ

hamāre ishq kī ye vārdāt hai hī nahīñ

kisi bhi lamha ghamon se najat hai hi nahin

hayat kahte hain jis ko hayat hai hi nahin

talash kijiye apnon mein kaun qatil hai

hamare qatl mein ghairon ka hath hai hi nahin

na chand tare na jugnu na chandni ki qaba

main raat kahta hun jis ko wo raat hai hi nahin

mujhe to zahr hi pina hai har zamane mein

mere nasib mein aab-e-hayat hai hi nahin

sar-e-salib jo main hans raha hun kyon na hansun

KHushi ka lamha hai ye gham ki baat hai hi nahin

har ek samt tera nur hai jidhar dekhun

mere wajud mein meri to zat hai hi nahin

hazaron log mile pyar karne wale hamein

magar kisi mein tumhaari si baat hai hi nahin

wo mere pas hai phir bhi bahut akela hun

main us ke sath hun wo mere sath hai hi nahin

main kyon udas hun mat puchiyega is ka sabab

ajib baat hai ki koi baat hai hi nahin

hamare ishq mein shamil hawas kahan thi miyan

hamare ishq ki ye wardat hai hi nahin