kisi bhi shai pe aa jaane mein kitni der lagti hai

kisī bhī shai pe aa jaane meñ kitnī der lagtī hai

magar phir dil ko samjhāne meñ kitnī der lagtī hai

zarā sā vaqt lagtā hai kahīñ se uTh ke jaane meñ

magar phir lauT kar aane meñ kitnī der lagtī hai

balā kā ruup ye tevar sarāpā dhaar hiire kī

kisī ke jaan se jaane meñ kitnī der lagtī hai

faqat āñkhoñ kī jumbish se bayāñ hotā hai afsāna

kisī ko haal batlāne meñ kitnī der lagtī hai

sabhī se uub kar yuuñ to chale aa.e ho ḳhalvat meñ

magar ḳhud se bhī uktāne meñ kitnī der lagtī hai

shu.ūr-e-mai-kada is kī ijāzat hī nahīñ detā

vagarna jaam chhalkāne meñ kitnī der lagtī hai

ye shīshe kā badan le kar nikal to aa.e ho lekin

kisī patthar se Takrāne meñ kitnī der lagtī hai

kisi bhi shai pe aa jaane mein kitni der lagti hai

magar phir dil ko samjhane mein kitni der lagti hai

zara sa waqt lagta hai kahin se uTh ke jaane mein

magar phir lauT kar aane mein kitni der lagti hai

bala ka rup ye tewar sarapa dhaar hire ki

kisi ke jaan se jaane mein kitni der lagti hai

faqat aankhon ki jumbish se bayan hota hai afsana

kisi ko haal batlane mein kitni der lagti hai

sabhi se ub kar yun to chale aae ho KHalwat mein

magar KHud se bhi uktane mein kitni der lagti hai

shuur-e-mai-kada is ki ijazat hi nahin deta

wagarna jam chhalkane mein kitni der lagti hai

ye shishe ka badan le kar nikal to aae ho lekin

kisi patthar se Takrane mein kitni der lagti hai