kisi bhi taur tabiat kahan sambhalne ki

kisī bhī taur tabī.at kahāñ sambhalne kī

tū mil bhī jaa.e to hālat nahīñ badalne kī

ḳhud apnī ham-safarī se bhī ho ga.e mahrūm

ki aarzū thī tujhe saath le ke chalne kī

kisī tarah to mile qahr-e-bekasī se najāt

koī to raah ho is karb se nikalne kī

asiir hī rahe ham pichhle ahd-nāmoñ ke

hameñ ḳhabar hī nahīñ thī ruteñ badalne kī

havāoñ ne hameñ jaḌ se ukhāḌ kar pheñkā

ki aarzū thī hameñ phūlne kī phalne kī

banā liyā hameñ apnī hī tarah kā tū ne

hameñ jo zid thī tirī ḳhvāhishoñ meñ Dhalne kī

udaas shāmoñ ko kyā dekh dekh rote ho

abhī to ā.eñgī rāteñ lahū ugalne kī

ek aise vaqt meñ jab zindagī bhī maut lage

'riyāz' kaun sī sūrat ho dil bahalne kī

kisi bhi taur tabiat kahan sambhalne ki

tu mil bhi jae to haalat nahin badalne ki

KHud apni ham-safari se bhi ho gae mahrum

ki aarzu thi tujhe sath le ke chalne ki

kisi tarah to mile qahr-e-bekasi se najat

koi to rah ho is karb se nikalne ki

asir hi rahe hum pichhle ahd-namon ke

hamein KHabar hi nahin thi ruten badalne ki

hawaon ne hamein jaD se ukhaD kar phenka

ki aarzu thi hamein phulne ki phalne ki

bana liya hamein apni hi tarah ka tu ne

hamein jo zid thi teri KHwahishon mein Dhalne ki

udas shamon ko kya dekh dekh rote ho

abhi to aaengi raaten lahu ugalne ki

ek aise waqt mein jab zindagi bhi maut lage

'riyaz' kaun si surat ho dil bahalne ki