kisi chaman mein Thaharte nahin saba ki tarah

kisī chaman meñ Thaharte nahīñ sabā kī tarah

khilā ke phuul guzarte haiñ ham havā kī tarah

hamāre ahd meñ kuchh aise bhī haiñ farzāne

ḳhudā nahīñ haiñ magar rahte haiñ ḳhudā kī tarah

vo apne ḳhol se nikle to muñh chhupā le badī

vo ek shaḳhs jo rahtā hai devtā kī tarah

hazār shimr jafāoñ pe haiñ kamar-basta

ye daur ham pe musallat hai karbalā kī tarah

bahut dinoñ se hai ḳhud apnī justujū mujh ko

bikhar gayā huuñ fazā meñ kisī sadā kī tarah

mujhe ḳhud apne tahaffuz kī fikr kyā hotī

vo mujh se miltā rahā dard-āshnā kī tarah

mahak uThā mire saare vajūd kā sahrā

jo dasht-e-zehn se guzre ho tum sabā kī tarah

har ek chehre pe hai aks ajnabiyyat kā

koī to mujh ko nazar aa.e āshnā kī tarah

nikhar uThe mirā sahrā-e-zīst bhī 'mehdī'

kabhī idhar jo baras jaa.e vo ghaTā kī tarah

kisi chaman mein Thaharte nahin saba ki tarah

khila ke phul guzarte hain hum hawa ki tarah

hamare ahd mein kuchh aise bhi hain farzane

KHuda nahin hain magar rahte hain KHuda ki tarah

wo apne KHol se nikle to munh chhupa le badi

wo ek shaKHs jo rahta hai dewta ki tarah

hazar shimr jafaon pe hain kamar-basta

ye daur hum pe musallat hai karbala ki tarah

bahut dinon se hai KHud apni justuju mujh ko

bikhar gaya hun faza mein kisi sada ki tarah

mujhe KHud apne tahaffuz ki fikr kya hoti

wo mujh se milta raha dard-ashna ki tarah

mahak uTha mere sare wajud ka sahra

jo dasht-e-zehn se guzre ho tum saba ki tarah

har ek chehre pe hai aks ajnabiyyat ka

koi to mujh ko nazar aae aashna ki tarah

nikhar uThe mera sahra-e-zist bhi 'mehdi'

kabhi idhar jo baras jae wo ghaTa ki tarah