kisi din dekh lo aalam meri betabi-e-dil ka

kisī din dekh lo aalam mirī betābī-e-dil kā

tamāshā dekhnā manzūr hai gar raqs-e-bismil kā

agar yaad aa gayā ik dam taḌapnā mujh se bismil kā

har ik jauhar banegā chashm-e-giryāñ teġh-e-qātil kā

gunahgāroñ pe apne gar chalegī tez ho ho kar

yaqīñ hotā hai dam chaḌh jā.egā shamshīr-e-qātil kā

vo giryāñ thā asar baaqī hai jis kā ba.ad-e-murdan bhī

Tapaktā hai banāte haiñ agar kaasa mirī gil kā

shahādat to milī lekin burā ho saḳht-jānī kā

rahegā dard dil meñ sadma-e-bāzū-e-qātil kā

dikhā do āḳhirī dīdār āsānī se dam nikle

nahīñ mushkil hai kuchh āsān honā merī mushkil kā

namāz apnī qazā ho jā.egī ka.abe meñ ai vaa.iz

dam-e-takbīr gar dhyān aa gayā abrū-e-qātil kā

shahīd-e-teġh-e-abrū jānte the dost gar mujh ko

kafan denā thā dāmān-e-nigāh-e-nāz-e-qātil kā

hamārī saḳht-jānī se huī ḳhiffat use hāsil

isī baa.is se muñh utrā huā hai teġh-e-qātil kā

safā.ī is ko kahte haiñ ki qismat tak nahīñ baaqī

mirī gardan pe ye ehsān hai shamshīr-e-qātil kā

tire ai rashk-e-lailā kyoñ na hoñ jinn-o-bashar āshiq

banā hai parda-e-chashm-e-parī se parda mahmil kā

tū hī shauq-e-shahādat kuchh hamārī dast-gīrī kar

qadam uThte nahīñ aur hai irāda kū-e-qātil kā

Daro dil meñ ḳhudā kā ḳhauf karnā tum ko lāzim hai

huā achchhā nahīñ mismār karnā ka.aba-e-dil kā

na chaar āñkheñ kisī se kiiñ chalā vo sho.ala-rū uTh kar

bajā ronā hai ye āTh-āTh aañsū sham-e-mahfil kā

tire bīmār ko habb-e-shifā kī kyā zarūrat hai

abhī sehat ho gar bosa mile ruḳhsār ke til kā

gale se jis tarah tauq-e-gulū ko mere ulfat hai

rahegā paañv se bhī silsila qaa.em salāsil kā

butān-e-sang-dil ke dil meñ har dam yaad rahtī hai

ta.ajjub kyā agar ho jaa.e mujh ko āriza sil kā

na kyūñkar nūr-afzā-e-nigāh-e-ishq-bāzāñ ho

tumhārī zulf duuda hai charāġh-e-māh-e-kāmil kā

talāsh ik rashk-e-lailā kī hai aisī dasht-e-vahshat meñ

ki mujh ko har bagūle par gumāñ hotā hai mahmil kā

hazār ai jaan tum chāh-e-zaqan par zulf laTkā do

nikalnā saḳht mushkil hai hamāre yūsuf-e-dil kā

hamārī aah bijlī kī tarah taḌpegī ai 'vahbī'

banegā āsmāñ jis vaqt dūd-e-ātish-e-dil kā

kisi din dekh lo aalam meri betabi-e-dil ka

tamasha dekhna manzur hai gar raqs-e-bismil ka

agar yaad aa gaya ek dam taDapna mujh se bismil ka

har ek jauhar banega chashm-e-giryan tegh-e-qatil ka

gunahgaron pe apne gar chalegi tez ho ho kar

yaqin hota hai dam chaDh jaega shamshir-e-qatil ka

wo giryan tha asar baqi hai jis ka baad-e-murdan bhi

Tapakta hai banate hain agar kasa meri gil ka

shahadat to mili lekin bura ho saKHt-jaani ka

rahega dard dil mein sadma-e-bazu-e-qatil ka

dikha do aaKHiri didar aasani se dam nikle

nahin mushkil hai kuchh aasan hona meri mushkil ka

namaz apni qaza ho jaegi kabe mein ai waiz

dam-e-takbir gar dhyan aa gaya abru-e-qatil ka

shahid-e-tegh-e-abru jaante the dost gar mujh ko

kafan dena tha daman-e-nigah-e-naz-e-qatil ka

hamari saKHt-jaani se hui KHiffat use hasil

isi bais se munh utra hua hai tegh-e-qatil ka

safai is ko kahte hain ki qismat tak nahin baqi

meri gardan pe ye ehsan hai shamshir-e-qatil ka

tere ai rashk-e-laila kyon na hon jinn-o-bashar aashiq

bana hai parda-e-chashm-e-pari se parda mahmil ka

tu hi shauq-e-shahadat kuchh hamari dast-giri kar

qadam uThte nahin aur hai irada ku-e-qatil ka

Daro dil mein KHuda ka KHauf karna tum ko lazim hai

hua achchha nahin mismar karna kaba-e-dil ka

na chaar aankhen kisi se kin chala wo shoala-ru uTh kar

baja rona hai ye aaTh-aTh aansu sham-e-mahfil ka

tere bimar ko habb-e-shifa ki kya zarurat hai

abhi sehat ho gar bosa mile ruKHsar ke til ka

gale se jis tarah tauq-e-gulu ko mere ulfat hai

rahega panw se bhi silsila qaem salasil ka

butan-e-sang-dil ke dil mein har dam yaad rahti hai

tajjub kya agar ho jae mujh ko aariza sil ka

na kyunkar nur-afza-e-nigah-e-ishq-bazan ho

tumhaari zulf duda hai charagh-e-mah-e-kaamil ka

talash ek rashk-e-laila ki hai aisi dasht-e-wahshat mein

ki mujh ko har bagule par guman hota hai mahmil ka

hazar ai jaan tum chah-e-zaqan par zulf laTka do

nikalna saKHt mushkil hai hamare yusuf-e-dil ka

hamari aah bijli ki tarah taDpegi ai 'wahbi'

banega aasman jis waqt dud-e-atish-e-dil ka